নাটক – ৰূপালীম্
[জ্যোতিপ্ৰসাদ আগৰৱালা]
দ্বিতীয়
অঙ্ক
[গাঁৱত জুনাফাৰ
চাংঘৰৰ আগচোতাল ৷সোঁফালে চোতাললৈ মুখকৈ আৰু পাছৰ সোঁফালে চোতাললৈ মুখকৈ দুটা চাংঘৰ
৷বাওঁফালে মুকলি আকাশ আৰু অলপ দূৰৈত পৰ্ব্বতবোৰ ৷ আবেলি তিনি চাৰিজনীমান ৰূকমী
ছোৱালী ৷কোনোজনীয়ে উৰালত ধান খুন্দিছে ৷ কোনোজনীয়ে কুলাত জাৰিছে আৰু কোনোজনীয়ে
চালিছে আৰু মুখেৰে গীত গাব লাগিছে ৷ৰূপালীমে এঠাইত বহি কঁকালত লোৱা তাঁত বৈছে আৰু
মাজে মাজে আন ছোৱালীবোৰৰ সৈতে কথা পাতি হাঁহি-ধেমালিকৈ আছে ৷]
গীত :-
ৰূকমী ছোৱালী:- জিলিকা পাখিৰে
অ’ সোণ ম’ৰা চৰাই !
ৰঙা
সেউজীয়া তৰাফুটুকীয়া
তোৰ
গোট গাৱতে
অ’ সোণ ম’ৰা চৰাই !
জুৰিটিৰ
পাৰতে নাচ ঠেও ধৰি
তোৰ
মৰমতে মৰো
অ’ সোণ ম’ৰা চৰাই !
[গীত
চলি থকাৰ মাজতে জুনাফাই পিঠিত খৰি এবোজা লৈ তালৈ সোমাই আহি খৰিবোজা মাজতে থয় ৷ছোৱালীবোৰলৈ
চাই সন্তোষেৰে হাঁহি চাংঘৰৰ ভিতৰলৈ সোমাই যায় ৷এনেতে ছোৱালীবোৰৰ মাজতে বাঘৰ মূৰ
এটা ধুম্কৈ পৰে ৷ ছোৱালীবোৰে ভয় খাই চিঞৰি তাৰপৰা ফাঁহি চিটিকা দিয়ে ৷মাথোন
ৰূপালীমে বহাৰপৰা উঠি বিস্ময়েৰে বাঘটোৰ মূৰটোলৈ চাই “আপু” “আপু”কৈ চিঞৰে
৷ তাতে জুনাফা চাংঘৰৰপৰা ওলাই আহে ৷ মায়াব’
হাতত ধনু-কাঁৰ লৈ ওলাই আহে ৷সোঁহাতত তাৰ মিত, তেজেৰে ৰাঙলী ৷ সোমাই আহি জুনাফা আৰু
ৰূপালীমৰ ফালে চাই নমতা নোবোলাকৈ থাকে ৷জুনাফাই মায়াব’লৈ
চাই ভৰিৰপৰা মূৰলৈকে পৰ্য্যবেক্ষণ কৰি হাতেৰে বাঘৰ মূৰটো কাণত ধৰি দাঙে আৰু তাক
ভালকৈ চাই, এবাৰ বাঘৰ ফালে এবাৰ মায়াব’লৈ
চাই সন্তোষেৰে মূৰ জোকাৰে ৷ ৰেণথিয়াঙে লৰালৰিকৈ তালৈ সোমাই আহি থাপ মাৰি জুনাফাৰ
হাতৰপৰা বাঘৰ মূৰটো আনি মায়াব’ক
কয় ৷ ৰূপালীম্ ভয় খাই কেখোজমান পাছলৈ গৈ ঘৰৰ দুৱাৰ মুখত ৰয়গৈ ৷]
ৰেণথিয়াং :- [মায়াব’ক ] কাপুৰুষ ! লোকৰ চিকাৰ আনি বীৰ বোলাইছ ?
[তাচ্ছিল্যৰ হাঁহি মাৰি তাৰপৰা যাবলৈ ধৰোঁতেই মায়াব’ই
হাতত থাপ মাৰি ধৰে ৷]
মায়াব’
:- তাৰ মানে ?
ৰেণথিয়াং :- তাৰ মানে
আৰুনো কি ? লোকৰ শৰত পৰা বাঘৰ মূৰটো নিজৰ বুলিবলৈ অলপো সঙ্কোচ লগা নাইনে ?
মায়াব’
:- তুমি মিছা কৈছা ৷
ৰেণথিয়াং :- সাৱধানে
কথা কবি ৷ মই কোন নেজান হবলা ?
মায়াব’
:- তুমি যিয়েই হোৱা নেলাগে, মূৰটো কেতিয়াও তোমাৰ হ’ব
নোৱাৰে ৷
[মায়াব’ই
তাৰ হাতৰপৰা মূৰটো কাঢ়ি আনে ৷ ৰেণথিয়াঙেও তাৰপৰা কাঢ়ি আনিবলৈ যায় ৷ ইয়াৰপৰাই
দুয়োৰে মাজত মৰামৰি লাগে ৷ ৰেণথিয়াং আহত হৈ মাটিত পৰি যায় ৷ সেহাই সেহাই উঠি মায়াব’ৰ
ফালে খাওঁ খাওঁ মূৰ্তিৰে চাই তাৰপৰা ওলাই যায় ৷]
জুনাফা :- [আচৰিত হৈ মায়াব’ৰ
ওচৰলৈ আহি ] মায়াব’ !
এইবোৰৰ মানে কি ?
মায়াব’
:- [সেহাই সেহাই ] আজি তিনিদিন এই বাঘটোৰ পাছে পাছে
ফুৰিছোঁ ৷ আজি কিন্তু সি মোৰ শৰৰপৰা সাৰিব নোৱাৰিলে ৷ঘাইল হৈ বাঘটোৱে হাবি-বন
মহটিয়াবলৈ ধৰিলে ৷আৰু এডাল কৰবাৰ কাঁৰ সোঁ-সোঁকৈ আহিল ৷ বাঘৰ গাৰপৰা দূৰেদি গৈ গছ
এজোপাত বিন্ধ খাই ৰ’লগৈ ৷ মই
ছল চাই গৈ বাঘৰ মূৰত ঘাপ শোধালোঁগৈ ৷মূৰটো হাতত লৈয়ে দেখিলোঁ এই মানুহটোৱে হাতত
ধনু-কাঁৰেৰে অলপ দূৰতে ৰৈ আছে ৷ মূৰ হাতত লৈ গুচি আহিলোঁ ৷ তাৰ পিছত এই ঘটনা ৷
[এনেতে ৰূপালীম্ লৰ মাৰি মায়াব’ৰ
ওচৰলৈ আহে ৷]
ৰূপালীম্:- মায়াব’ !
মায়াব’ !
তুমি বাঘটোৰ মূৰটো কেলৈ কাটিলা ?
মায়াব’ :- এনেয়ে ৷
ৰূপালীম্ :-
পিছে, তাৰ পোৱালিবোৰক কোনে খুৱাব ? সিহঁত মৰি যাব নহয় ?
মায়াব’
:- যোৱাচোন ৰূপালীম্, পানী অলপমান আনাগৈ ৷ মোৰ বৰ পিয়াহ লাগিছে ৷
ৰূপালীম্ :- বাৰু
মায়াব’ ৷ পিছে বাঘৰ পোৱালিকিটাও তুমি
আনিবা দেই ৷ মই সিহঁতক খাবলৈ দিম, নহ’লে সিহঁতে
অকলে অকলে হাবিত কান্দি কান্দি ঘূৰি ফুৰিব ৷আনিবা দেই ৷
[ ভিতৰলৈ পানী
আনিবলৈ যায় ৷]
জুনাফা :- মায়াব’ ! সঁচাকৈয়ে
তই চিকাৰ কৰিব পাৰ ! ৰূপালীমক তই পোহপাল দিব পাৰিবি ৷
মায়াব’
:- তেন্তে তুমি মোৰ লগত ৰূপালীমক বিয়া দিবা ?
জুনাফা :- ওঁ...
[এই বুলি জুনাফাই মনতে অলপ চিন্তা কৰে ৷]
মায়াব’
:- [বুঢ়াৰ মুখলৈ অলপ পৰ চাই ] জুনাফা ! ক’তা
? তুমি দেখোন মুকলি মনেৰে কব পৰা নাই ৷
জুনাফা :-
মায়াব’ ! তই যে পুহিব পাৰিবি সেই বিষয়ে
মোৰ অলপো সন্দেহ নাই ৷ পিছে... মই কেনেকৈ থাকিম মায়াব’ ?
মই আজি এই পোন্ধৰ বছৰ তাইক বুকুত বান্ধি লৈ ফুৰাইছোঁ ৷মোৰ এজনী জী ৷ তাই মৰিবৰ
সময়ত তাইৰো একেজনী জীয়েক ৰূপালীমক মোক গতাই দি গৈছে ৷ তাইক মই মোৰ জীৱটোৰ দৰে ৰাখি
আছোঁ ৷
[এনেতে
ৰূপালীমে বাটি এটাত পানী আনি মায়াব’ক
দিয়ে আৰু মায়াব’ই লৈ খাবলৈ
ধৰে ৷ ৰূপালীমে পৰি থকা বাঘৰ মূৰটোৰ ওচৰলৈ গৈ তালৈ এবাৰ আচৰিত হৈ আৰু এবাৰ বেজাৰকৈ
চাই হাতেৰে চুব খোজে ৷ হাত কোচাই আনে ৷]
ৰূপালীম্ :- বাঘৰ
মূৰটো তুমি কেলৈ কাটিলা মায়াব’ ?
মায়াব’
:- [অলপ হাঁহি ] তোমাক বিয়া কৰাবলৈ ৷ ৰূপালীম্ [লাজ কৰি জুনাফাৰ
ফালে কেৰাহিকৈ চায় ৷]
জুনাফা :- [গহীনকৈ তাইলৈ মৰম বেজাৰেৰে চাই মূৰ জোকাৰি ] ওঁ
!
[ৰূপালীমে
অলপ লাজ কৰি আনফালে মূৰ কৰে ৷]
[জুনাফাই তাইৰ
মুখৰ ফালে ৰৈ চাই থাকে ৷ এনেতে দূৰৈত চিকাৰ কুকুৰৰ ভুক্ভুকনি শুনা যায় আৰু আটাইবোৰ
আচৰিত হয় ৷ মায়াব’ই
সেইফালে ডিঙি মেলি মেলি চাই কিছু উদ্বিগ্ন হয় আৰু ৰূপালীমক হাতত ধৰে ৷]
মায়ব’
:- ৰূপালীম্ ! তুমি ঘৰৰ ভিতৰলৈ যোৱাচোন ৷ এইবোৰ কোনোবা শত্ৰু আহিছে
৷ তুমি নোলাবা ৷
[তাইক ঘৰৰ
ফালে হেঁচোকা মাৰি দিয়ে আৰু তায়ো কোনো প্ৰতিবাদ নকৰি সোমাই যায় ৷]
জুনাফা
! এই পাষণ্ড কেইটা আকৌ কাজিয়া কৰিবৰ মনেৰে আহিছে ৷
[মায়াব’
আগন্তুক বিপদৰ কাৰণে সষ্টম হৈ থাকে ৷ জুনাফাক কিছু সশঙ্কিত যেন দেখা যায় ৷ৰেণথিয়াং
দম্ভেৰে তালৈ হাতত কাঁৰ এপাত লৈ সোমাই আহে ৷ আহি মায়াব’
আৰু জুনাফাৰ আগতে সগৰ্ব্বে থিয় হৈ হাতৰ কাঁৰপাতেৰে মায়াব’ক
দেখুৱাই সি অহা ফালে ভিতৰলৈ চাই কয় ৷]
ৰেণথিয়াং :-
প্ৰভু ! এই দুৰাচাৰ কাপুৰুষেই মোৰ চিকাৰৰ মূৰ কাটি ইয়াত তাৰ মইমতালি দেখুৱাইছেহি ৷
আৰু তাকে মই দাবী কৰিলত সি মোক অপমান কৰি আপোনাৰো অপমান কৰিছে ৷
[মায়াব’
ৰেণথিয়াঙৰ ফালে জোখৰ খোজেৰে আগবাঢ়ি আহি তাৰ ওচৰ নৌ পাওঁতেই মণিমুগ্ধ আহি তালৈ
কুকুৰলৈ চোৱাৰ দৰে চাই কয় ৷]
মণিমুগ্ধ :- মূৰ্খ
! নিলাজ ! খন্তেকতে বাঘৰ মূৰ উলিয়াই
ওভোতাই দে, চোৰ !
মায়াব’
:- আপুনি মোক বৰ বিমোৰত পেলাইছে ৷ বোধকৰোঁ আপুনি নাই দেখা দেখিহে
এনে কথা কৈছে ৷ দৰাচলতে এই বাঘ মোৰ শৰত পৰিছে ৷ আপোনাৰ ভ্ৰম ৷
ৰেণথিয়াং :-
ভ্ৰম ?
মায়াব’
:- অৱশ্যে ৷
মণিমুগ্ধ:-
ৰূকমী ডেকা ! মোৰ মানুহে মিছা কথা নকয় ৷
[খঙেৰে
আগবাঢ়ি যায় ৷ হঠাৎ জুনাফা সোমাই আহে ৷]
জুনাফা :-
কোন তোমালোক ? মোৰ চোতালত তোমালোকক এনে আচৰণ কৰিবলৈ কোনে অধিকাৰ দিছে ৷
মণিমুগ্ধ :- মোৰ
শক্তিয়ে দিছে ?
জুনাফা :-
তোমালোকক সম্ভ্ৰন্ত লোক যেন দেখিছোঁ ৷ পিছে ই কেনে বৰ্ব্বৰ আচৰণ ? অচিনাকি ! মোৰ
আদেশ... তোমালোক মোৰ ঘৰৰ চোতালৰপৰা আঁতৰ হোৱা ৷
ৰেণথিয়াং :- [জুনাফাৰ ওচৰলৈ চোঁচা মাৰি আহি বুঢ়াৰ ডিঙিত ধৰি ]
বৰ্ব্বৰ ! নিশকতীয়া বুঢ়া ! তোৰ কিহৰ ইমান তেজ ? কাক এনে বাক্য বুলিছ ?
[জুনাফাৰ
ডিঙিত চেপি জোকাৰিবলৈ ধৰে আৰু মায়াব’ই
খন্তেকৰ ভিতৰতে কাঁৰপাত অহাদি আহি ৰেণথিয়াঙক ডিঙিত ধৰি মুখত ঘুচিয়াই মাটিত পেলাই
দিয়ে ৷ তাতে দুয়োটাৰ তুমুল সংগ্ৰাম আৰম্ভ হয় ৷ জুনাফা কঁপি কঁপি মাটিত বহি যায় ৷মণিমুগ্ধই
কঁকালৰপৰা উলিয়াই এটা পেঁপা বজায় ৷পাচোটামান বন্দী গৰখীয়া সেনা আহি তৎক্ষণাত
ৰেণথিয়াঙক মায়াব’ৰ হাতৰপৰা
মুক্ত কৰি আনে ৷মায়াব’
উঠিবলৈ ধৰোঁতে কেইবাটাও সেনাই ধৰি ধনঞ্জয় প্ৰহাৰ আৰম্ভ কৰিলত সি পৰি যায় ৷ৰেণথিয়াঙে
তেতিয়া হাতৰ চাবুকেৰে তাক মূৰে-গায়ে একোনাই হৈ কোবাবলৈ ধৰে ৷মায়াব’ৰ
মুখে-নাকে তেজ ববলৈ ধৰে ৷ সি মাটিত পৰি মূৰ্চ্ছা যায় ৷ মায়াব’ৰ
অৱস্থা দেখি জুনাফাই থাকিব নোৱাৰি চিঞৰিবলৈ ধৰে ৷]
জুনাফা :-
কিন আছ ? কোন আছ ? ৰাখহি ! ৰাখহি ! গাঁৱৰ ডেকা বুঢ়া, কোন আছ চাহি ৷
[চাৰিওফালে
বলিয়াৰ দৰে লৰি-ঢাপৰি চিঞৰিবলৈ ধৰিলে ৷]
আহ অ’ !
কোন আছ ....
[জুনাফাৰ
চিঞৰোতে চিঞৰোতে মাত ক্ষীণ হৈ পৰে ৷ ৰেণথিয়াঙে মায়াব’ক
এৰি জুনাফাৰ ওচৰলৈ আহে ৷]
ৰেণথিয়াং :- [মণিমুগ্ধক ] প্ৰভু ! এই বুঢ়াই সকলোৰে গুৰি ৷
আপোনাক ই অপমান কৰে... ই...ই... [চাবুক দাঙি ] ইয়াক.... ইয়াকহে ভালকৈ এসেকা দিব লাগে ৷
[জুনাফাক
কোবাবলৈ ধৰে ৷]
জুনাফা :- [খঙত বলিয়া হৈ ককালৰ মিত উলিয়াই] নহয়... নহয়...
তহঁতকো শুদাই নেৰিছোঁ ৷
[জুনাফাই মিত্
ঘূৰাবলৈ ধৰে ৷ ৰেণথিয়াং আঁতৰ হয় ৷ মণিমুগ্ধই ইঙ্গিত দিয়ে আৰু সেনাবোৰে মিত্
ইলিয়াই জুনাফাক বেঢ়ি ধৰে ৷এনেতে ৰূপালীমে উধাতু খাই আহি কয় ]
ৰূপালীম্:- নামাৰিবি
৷ নামাৰিবি ৷
[চাংঘৰৰ
ভিতৰৰপৰা ওলাই আহি সিহঁতৰ মাজত পৰেহি ৷ আটাইবোৰ ক্ষান্ত হয় ৷]
ৰূপালীম্:- [হুক্-হুক্ কৰে কান্দি ] নামাৰিবা, নামাৰিবা ৷
মোৰ আপুৱে তোমালোকৰ কি জগৰ কৰিলে বাৰু ? [জুনাফাৰ মুখলৈ
চাই হুক্-হুক্কৈ কান্দি] আপু ! আপু ! অ’
আপু ! .... [মায়াব’লৈ
চাই হুক্-হুক্কৈ কান্দি মায়াব’ৰ
ওচৰলৈ গৈ তেজ দেখি ভয়ত চিঞৰি ] আপু !... আপু !...
মায়াব’ৰ কি হ’ল
?... মায়াব’... মায়াব’
[ৰূপালীমে
মায়াব’ৰ মুখৰ তেজ
মচি দিবলৈ ধৰে ৷ মায়াব’
পৰি থাকে ৷ জুনাফাই অপমানত জৰ্জ্জৰিত হৈ কয় ]
জুনাফা :- শক্তিৰ
অধিকাৰ ! শক্তিৰ অধিকাৰ !! এৰা, শক্তিৰেই অধিকাৰ... বলীৰেই অখণ্ড প্ৰতাপ ৷
[ইমান সময়
মণিমুগ্ধ মন্ত্ৰমুগ্ধৰ দৰে ৰূপালীমৰ ফালে চাই আছিল ৷ মণিমুগ্ধ তেনেকৈ তন্ময় হৈ চাই
থাকোঁতে ৰেণথিয়াঙে কাণে কাণে কিবা কলেহি তাতে মণিমুগ্ধৰ টোপনি ভঙা যেন হ’ল
৷]
মণিমুগ্ধ :-
অৱশ্যে, অৱশ্যে, এই মুকুতা যদিও শামুকৰ পেটত উপজিছে, ইয়াত ইয়াৰ ঠাই নহয় ৷ ই
ৰাজকাৰেঙৰহে উপযোগী ৷ এই ৰূপহীজনী কোন ?
জুনাফা :-
কোন ? কেলৈ আমাক শাস্তি বিহি হেপাহ পলোৱা নাইনে ? এতিয়া আজলী ছোৱালী...
মণিমুগ্ধ :-[কোমলাই ] নহয় নহয় বুঢ়ামানুহ ! সেইবোৰ কথা আৰু
নুলিয়াবা ৷ যি হ’ল হ’ল
৷ পাহৰি যোৱা ৷ এইজনী সম্ভৱ তোমাৰেই জী নাইবা নাতিনী ৷ তাইৰ ৰূপলৈ চাই তাই তোমাৰ
জুপুৰীৰ কাৰণে নহয়, তাইৰ ৰূপৰ জেউতি আঢ্যৱন্তসকলৰ জোনাকী কাৰেঙৰ ভিতৰতহে দুগুণে
চৰিব ৷
জুনাফা :- [নিজৰ মনতে ৰোষত জ্বলি ] এনে কথাও মই শুনি
থাকিবলগীয়া হ’ল ! এনে
কথাও... মই সহিব লাগিব ৷ কিয় তোৰ শক্তি নাই ? তই কিয় দুৰ্ব্বল হৈ সংসাৰলৈ আহিছিলি
? দুৰ্ব্বলৰ কিহৰ মান... কিহৰ অপমান ? অপমানেৰে...ক্ষোভেৰে... নিজৰ গাৰ প্ৰতি তেজ
টোপালেৰে তই তোৰ দুৰ্ব্বলতাক পুহিব লাগিব ৷ এই পৃথিৱীৰ... নৈ-সাগৰ...বন উপবন...
ভালৰো ভাল, সুন্দৰৰো সুন্দৰখিনি...ৰূপৰো ৰূপ... কাৰ ভোগ্য ? বলীৰ ...শক্তিশালীৰ ৷
আৰু তই.... বলীৰ পাদুকাৰ মলি মাথোন ৷ পেলাই দিয়া চুৱা-পাতেৰে তোৰ ক্ষীণ আৰু
দুৰ্ব্বল অঙ্গ ৰক্ষা কৰিব লাগিব আৰু যদি ভুলত, অদৃষ্টৰ পৰিহাসত তোলৈ কিবা ভাল
বস্তু আহে... তাক তই বলীৰ হাতত দিব লাগিব ৷ তোৰ পুষ্ট শৰীৰটো বলীৰ পদ-সেৱাত... তোৰ
নিপোটল ল’ৰাটো বলীৰ হুকুমৰ আঙুলি
মূৰত... তোৰ সুন্দৰী ছোৱালীজনী... বলীৰ... সিহঁতৰ কাৰেঙৰ লিগিৰীকৈ দিবগৈ লাগিব ৷
মণিমুগ্ধ :-
বুঢ়া ! অনৰ্থক অনুশোচনাৰপৰা একো ফল নাই ৷
ৰেণথিয়াং :- প্ৰভু
! সন্ধিয়া হৈ আহিছে ৷ আমি আৰু সৰহ বেলি ইয়াত ইহঁতৰ সৈতে ৰেপাৰেপি কৰি থাকিব
নোৱাৰোঁ ৷ ইহঁতৰ যথোচিত শাস্তি হ’ল ৷ এতিয়া
নেদেখাজনৰ কৃপাত আমাৰ ভাগ্যত এই মুকুতাটি মিলিছে যেতিয়া...
মণিমুগ্ধ :- বুঢ়া
মানুহ ! তুমি আপোন ইচ্ছাই এই ৰূপহীৰ কপাল মুকলি কৰি দিয়া ৷ তুমি ৰূপহীক মোক সমৰ্পন
কৰা ৷ তাৰ সলনি... তোমাৰ এই জুপুৰিৰ সলনি... কাৰেং যেন ঘৰবাৰী আৰু সুন্দৰীৰ সলনি
তাইৰ শৰীৰৰ জোখৰ সোণ...
জুনাফা :-
সোণ ! সোণ ! সোণ নহয়... সোণ নেলাগে... ডকাইত... তোৰ প্ৰাণ....
[জুনাফাই
বুঢ়া বাঘৰ দৰে মণিমুগ্ধৰ গাত জাপ মাৰি পৰেহি ৷ মণিমুগ্ধই জুনাফাক হাতত ধৰি মাটিত
বগৰাই পেলায় ৷আনফালে ৰেণথিয়াঙে ৰূপালীমক মায়াব’ৰ
ওচৰৰপৰা কোলাত তুলি লৈ ওলাই যায় ৷ ]
ৰূপালীম :- [কান্দি কান্দি চিঞৰি ] আপু ! আপু ! ৰাখ অ’
মোক... কোন আছ ? কোন আছ ? [ৰেণথিয়াঙে তাইক উলিয়াই লৈ যায় ৷
ৰূপালীমে ৰেণথিয়াঙৰ কোলাত হাত ভৰি এচাৰি মূৰ আফালি কান্দি গছৰ পাত সৰুৱাই যায় ৷কিন্তু
আন এটাই মুখত সোপা দিয়াত চিঞৰ নুশুনা হয় ৷ইফালে মণিমুগ্ধৰ ৰখীয়া সেনাৰ সৈতে
জুনাফাৰ ভীষণ জুঁজ হয় ৷ এইবোৰৰ মাজত ৰূপালীমৰ এবাৰ দুবাৰ “আপু...আপু”
ক্ষীণ চিঞৰৰ শব্ধ শুনা যায় ৷মায়াব’ই
তাৰপৰা উঠো উঠো কৰে কিন্তু উঠিব নোৱাৰি লুটি খাই খাই পৰি যায় ৷ গৰখীয়া সেনা কেইটাক
ইঙ্গিত দিয়াত সিহঁতে আহি জুনাফাক ধৰি ৰাখি থয় ৷মণিমুগ্ধ তাৰপৰা খৰকৈ ওলাই যায় ৷
মণিমুগ্ধ ওলাই যোৱাৰ পিছতে সেনা কেইটাই জুনাফাক অতিপাতকৈ মৰিয়াই মৰিয়াই পেলাই থৈ
গুচি যায় ৷ জুনাফা আধা-মৰাৰ দৰে তাতে পৰি থাকে ৷ মায়াব’ই
কোনোমতে চুচৰি বাগৰি ইফালে সিফালে চাবলৈ প্ৰয়াস পায় আৰু সেহাই সেহাই “ৰূপালীম্,
ৰূপালীম্” বুলি
মাতিবলৈ চেষ্টা কৰে ৷ কঁপি কঁপি জুনাফা উঠে ৷ জুনাফাৰ মুখৰ আকৃতি দেখিলে ভয় লগা ৷
বুঢ়া চকুৱেদি জুইৰ আঙনি বৰষিছে... সৰসৰাই চকুৰ পানী বৈছে ৷]
জুনাফা :- [বলিয়াৰ দৰে ] ৰূকমী... ৰূকমী ডেকা-বুঢ়া আটাইবোৰ
জহি গলি নেকি ? উস্... মোৰ কি হ’ল
... কি হ’ল ? [হাওঁহাওঁকৈ কান্দি ] ৰূপালীম্...ৰূপালীম্ !
নাই, নাই... ধৰম নাই... বিচাৰ নাই... ৰজা নাই... ঈশ্বৰ নাই... অৰাজক... অৰাজক... [হাওঁহাওঁকৈ কান্দি] ৰূপালীম্... কলৈ গলি ? কোনে
নিলে তোক ? ৰূপালীম্ ! ৰূপালীম্...
[জুনাফা
অলিয়া-বলিয়া হৈ “ৰূপালীম্,
ৰূপালীম্” বুলি চিঞৰি
ওলাই যায় ... মায়াব’ই
উঠিবলৈ চেষ্টা কৰি পৰি পৰি যায় ৷ বাহিৰৰপৰা জুনাফাৰ “ৰূপালীম্”বোলা
চিঞৰ কাণত পৰেহি ৷জুনাফাৰ চিঞৰৰ লগে লগে মায়াব’ই
দুগুণে অস্থিৰ আৰু অধৈৰ্য হৈ ছাটিফুটি কৰিবলৈ ধৰে ৷]
জুনাফা :- [বাহিৰত ] ৰূপালীম্ ! ৰূপালীম্.... কোনে ফালে ?
কোনফালে ? কলৈ গলি অ’ ৰূপালীম্
৷
অ’
মোৰ
ৰূপালীম্
ৰূপালীম্
ৰূপালীম্
ৰূপালীম্
ৰূপালীম্
ঐক্যতান
(সিপিঠিত)
[ইউনিক’ড ৰূপান্তৰ : দিগন্ত শইকীয়া]
No comments:
Post a Comment