নাটক - শোণিত কুঁৱৰী
[জ্যোতিপ্ৰসাদ আগৰৱালা]
চতুৰ্থ অঙ্ক
দ্বিতীয় দৰ্শন
[বাণৰ নগৰ ৷ অন্ত:পুৰ ৷ মধুমতী আৰু কুঁজী কথা
পাতি পাতি সোমাই আহে ৷ ]
মধুমতী :- কুঁজী তোৰ কথা সঁচানে ?
উষাই এনে কৰিবনে ?
কুঁজী :- [মুখ বিকটাই ] মোক
মিছা কবলৈনো কিহে পাইছে আই ! অপোনাৰ শপত আই, মৰিবলৈ হেৰেই, সঁচাই উষাই অচিনাকি লৰা
এটা আনি তাৰ সঙ্গত আছে ৷ আমাৰ হাকবচন নুশুনে ৷ এ আই ! মোক চিত্ৰ-লেখীয়ে আকৌ মনে
মনে থাকিবলৈ বহুতো বুজালে নহয় ! মই বোলো কেতিয়াও কাকো নকওঁ দে ৷ পিছে মাকে ৰাতি
মনে মনে গুচি আহিলোঁ ৷ এৰা আই এনেহে কথা ৷ পিছে এতিয়া কি কৰিব খুজিছে ?
মধুমতী :- [অলপ পৰ
ভাবি ] পিছে কিনো কৰো এতিয়া ? মনে মনে লৰাটোক বঢ়াই-বুজাই পঠিয়াই দেগৈ ৷ ইমান
পালি-পহৰীয়াৰ মাজত ! জাননে কুঁজী, লৰাটো ক’ৰ
?
কুঁজী :- লৰাটোৰ কথাকে নকবা আই !
সাইলাখ দেৱতাহে ৷ মুখকে চাবানে, ভৰিকে চাবানে, চকুকে চাবানে, নাককে চাবা ! যেয়েই
নহওক আই, দুয়োটা মিলি পৰিছে ৷ দেৱতাৰ বাহিৰেনো আন কোন সোমাবহি ?
মধুমতী :- নিশ্চয় উষাই যোগ্য জনৰ
হাততহে আত্মসমৰ্পণ কৰিছে ৷ মই আগেয়ে মহাৰাজক কৈছিলোঁ, কিন্তু তেতিয়া মোৰ কথা
নুশুনিলে ৷
কুঁজী :- আই ! পিছে কথাটোতো ৰজাক জনাব
লাগিব নহয় ! ৰজাই মোৰ গাতহে তাইৰ ভাৰ দিছিল ৷ যদি আই মই কথাটো লুকুৱাওঁ মোকতো
শুদাই নেৰিব ৷
মধুমতী :- নহয় নহয়,
ৰজাক নকবিগৈ কুঁজী !
কুঁজী :- নহয়, নহয় আই ! নহলে মই কটা
যাব লাগিব ৷ ইমান ডাঙৰ কথাটোনো কেনেকৈ লুকুৱাই থওঁ ?
মধুমতী :- কুঁজী ! আগেয়ে তই মই
কোৱা্টোকে কৰচোন... দুয়ো গৈ বঢ়াই-বুজাই লৰাটোক পঠাই দিওঁগৈ ৷ বাৰু, চিত্ৰলেখা
থকাতেনো এইবোৰ কেনেকৈ হবলৈ পালে ?
কুঁজী :- এ, আই ! তাইৰ কথানো কি কবা
? চিত্ৰৰো যোগ আছে আই ! চিত্ৰৰো যোগ আছে ৷... পিছে কথাটো ৰজাৰ কাণছুৱাই থলেহে ভাল
৷ মই যাওঁ ৷
মধুমতী :- নহয় নহয়
কুঁজী, নকবিগৈ ৷ মোৰ ছোৱালী আৰু জীয়াই নাথাকিব ৷
কুঁজী :- নকলে আই, মোৰ মূৰ যাব আই !
মোৰ মূৰ যাব ৷ [যাব খোজে ]
মধুমতী :- [নিজৰ ডিঙিৰ
মুকুতামালাধাৰ সোলোকাই দি ] হোঁ কুঁজী ! এইধাৰকে তোক দিছোঁ ; তই নকবি ৷ ৰজাই
আৰু মোৰ ছোৱালীক জীয়াই নাৰাখিব ৷
কুঁজী :- [মালাধাৰ লৈ ] কবলৈতো
হাক দিছে ৷ পিছে... বাৰু নকওঁ ৷ তেন্তে আপুনিও ব’লক,
যি কৰে কৰিবগৈ ৷
মধুমতী :- বাৰু মই ওলাওঁগৈ ৷ তয়ো আহা
৷[যায়গৈ ]
কুঁজী :- [মালাধাৰ ডিঙিত পিন্ধি ]
আই... আই ... এওঁক কওঁতেই দেখোন মুকুতামালা পালোঁ একা ! ৰজাক ক’লে
বা কি কৰে ! নিশ্চয় মোক পটেশ্বৰী কৰিবই কৰিব ৷ এই সুবিধা এৰি দিয়া নাযায় ৷ মাকে,
মোৰ কপাল ফুলিছে ৷ বুঢ়ী হৈছোঁ বুলিও তিনিজনী ডেকেৰীতকৈও চাৰ ৷ এৰা, ৰজাৰ ওচৰলৈ
যাবহে লাগিল ৷ মোক আকৌ জীয়েকক গতাই দিছে ৷ পিছে জীয়েকে কৰিব সেইখন, মই মাজতে কটা
যাওঁ কিয় ? [গুচি যায়গৈ ]
(সিপিঠিত)
[ইউনিক’ড ৰূপান্তৰ : দিগন্ত শইকীয়া]
No comments:
Post a Comment