নাটক - শোণিত কুঁৱৰী
[জ্যোতিপ্ৰসাদ আগৰৱালা]
প্ৰথম অঙ্ক
[বাণৰ নগৰ ৷ ৰাজকাৰেঙৰ ভিতৰত ফুলনিত
উষা সখীসকলৰ সৈতে ফুৰি ফুৰিছিল আৰু সখীয়েকসকলে নাচি নাচি গীত গাইছিল ৷ উষাই ফুল
ছিঙি ফুৰিছিল, আৰু মাজে মাজে এবাৰ দুবাৰ গীতো গাইছিল ৷ লাহে লাহে সন্ধিয়া হৈ
আহিছিল ৷]
গীত
(কোনে) গছে গছে পাতি দিলে
ফুলৰে শৰাই
(ৰাম
ৰাম )
কলিয়া ভোমোৰা
গুঞ্জৰি আহে
গোন্ধকে ধিয়াই
(ৰাম ৰাম
)
কোনে গোলাপী সখীক
এনে হাঁহি দিলে
ৰূপতে ৰাঙে চৰাই....
ওৰণি তলতে
পৰিমল ৰেণু
উৰুৱাই পৱনে
দিলে বিলাই ৷৷
[বাণ লাহে লাহে সোমাই আহে ৷ গীতৰো
অন্ত পৰে ৷]
উষা :- পিতা ! পণ্ডিতে মোলৈ দেখোন
আৰু পুথি নেলেখে, মোক আৰু ছবি লাগে ৷
বাণ :- অ’,
মই পাহৰি আছোঁ ৷ কাইলৈ বাৰু মই সভাপণ্ডিতক ক’ম
৷
উষা :- পিতা ! চিত্ৰ সখীয়ে হেনো
বৰণবোৰ ভাল পোৱা নাই, নীল বৰণটো আকাশৰ বৰণৰ দৰে নহয় ৷
বাণ :- নীল বৰণেই আকাশৰ বৰণ, আৰুনো
কেনে হ’ব লাগে ? মই ক’ম বাৰু ৷
পিছে চিত্ৰ ! তই সিদিনা নতুন নাচোন এটা শিকিছিলি, ক’তা,
আমাক নেদেখুৱালি দেখোন ? ‘পদুম কলি’
নেকি ?
চিত্ৰ :- ওঁ, এতিয়াও ভালকৈ অহা নাই ৷
বাণ :- বাৰু, নাচচোন চাওঁ ৷
চিত্ৰ :- ভালকৈ এতিয়াও হোৱা নাই, বাৰু নাচো ! তুমি বীণখন
বজাবা দেই ৷
[উষাই বহি বীণ বজায়, বাণে এটা শিলৰ
ওপৰত বহি চায়, আৰু চিত্ৰলেখাই নাচে ৷]
পদুমকলি নাচ
[১]
পদুমণিখনি শুৱনি কৰিলে
কুমলীয়া
এটা কলিয়ে
ভাব তাৰ আছে
বুকুতে
লুকাই ৷
ভাষা তাৰ আছে
মুখ
ওপচাই ৷
নিচুকি আছিল... সময় তাৰ
আহিছেনে
নাই বুলিয়ে
[২]
সমীৰণ তাৰ কাষেদি
গ’ল,
ভোমোৰাও আহি বিতত
হ’ল ;
পুৱা-ৰ’দালিয়ে বাতৰি আনিলে
চেনেহ-চুমাটি
যাচিয়ে ৷
[৩]
সিদিনা ফাগুন দিন,
বিকশি
উঠিল
অন্তৰখনি...
বাজিল অমিয় মধুৰ বীণ ৷
[৪]
বাসন্তী উষাই জোনাকী জালেৰে
বেৰিলেহি
আহি চাৰিওকাষ
মুঞ্জৰি উঠিল হাঁহি মিচিকিয়া
মুঞ্জৰি উঠিল অন্তৰৰ কত
নিচুক
হাবিয়াস ৷
[৫]
হাঁহিলে কলিয়ে
দুটি
ওঁঠ ভৰি...
সমীৰণে ক’লে—“নিম
চুৰ
কৰি”,
ভোমোৰাই ক’লে—“পিউ সখি মৌ,
পিউ
সখি মৌ
প্ৰাণ
ভৰি ৷”
আপোন ভাবতে বিভোৰা পদুমী
হাঁহি হাঁহি, ক’লে – “ওঁহো ওঁহো...
একো
নিদিওঁ
থাকক হাঁহি, থাকক মধু
মধুৰ
জীৱন জুৰি ৷”
[৬]
সমীৰণ হলে থাকিল আগুৰি,
অভিমান কৰি ভোমোৰাটিয়েহে
গ’ল
দূৰলৈ উৰি ৷
[৭]
শান্ত স্নিগ্ধ পুৱা...
নবীন তৰুণ তপনে ক’লেহি—
“এয়া পালোঁহি প্ৰিয়া !
আজি প্ৰতীক্ষাৰ শেষ হ’ল
সখী,
বিৰহী
প্ৰিয়ক চুমা দিয়া ৷”
[৮]
দেখি পদুমীৰ হৰিলে মাত,
বিজুলী
সঞ্চাৰ লাগিল গাত,
প্ৰেমিকৰ
শুনি মধুৰ বচন
প্ৰাণ
উটুৱাই নিয়া...
“বিৰহী প্ৰিয়ক চুমা দিয়া ৷”
[৯]
লাজতে আবেগ ৰুধিব নোৱাৰি
পদুমী
উৰ্দ্ধমুখ ;
সেয়ে পদুমীৰ কত জনমৰ
কত
কল্পনাৰ সুখ,
বাতৰি পদুমী-প্ৰণয়ৰ
উঠি
বোকোচাত পোহৰৰ
ক’লে প্ৰমিকক—
“দিয়া... প্ৰতিদান দিয়া ;
চিৰজনমৰ প্ৰিয় মোৰ তুমি
চিৰজনমৰ
সঞ্চিত মধু
অধৰৰ
মোৰ
বাটি
ভৰি সখা পিয়া ৷”
বাণ :- বাৰু, বেছ হৈছে ৷
[এনেতে দুৱৰী আহি সেৱা জনায় ৷]
কি ?
দুৱৰী :- প্ৰভু ! সেনাপতি
প্ৰসেঞ্জিতে যুদ্ধত জয়ী হৈ আপোনাৰ সাক্ষাৎ প্ৰাৰ্থনা কৰিছে ৷
বাণ :- বিজয় অনিবাৰ্য্য ৷ ক’ত
? সেনাপতি প্ৰসেঞ্জিত !
[প্ৰসেঞ্জিত সোমাই আহি শিৰ দোঁৱায় ৷]
প্ৰসেঞ্জিত :- প্ৰভু !
দাসৰ সেৱা গ্ৰহণ কৰক ৷
বাণ :- বীৰ প্ৰসেঞ্জিত ! মই তোমাৰ
ওপৰত সন্তুষ্ট ৷ দেৱতাৰ দৰ্পচূৰ্ণ অৱশ্যম্ভাৱী ৷ দানৱৰ সদায় জয় ৷ যোৱা সেনাপতি !
নগৰত আনন্দ-উৎসৱ কৰিবলৈ আদেশ দিয়াগৈ ৷ আজি সকলোৱে হাঁহক, গাওক, নাচক ৷ যোৱা
প্ৰসেঞ্জিত ! দেৱতাসকলক মোৰ আগলৈ লৈ আহাঁগৈ ৷
প্ৰসেঞ্জিত :- প্ৰভুৰ
আজ্ঞা শিৰোধাৰ্য্য ৷
[সেৱা
কৰি যায়গৈ ৷]
উষা :- পিতা ! দেৱতাসকলক বন্দী কৰি
আনিছা নেকি ? তেওঁলোকক কি কৰিবা ?
বান :- বশ্যতা স্বীকাৰ কৰাই এৰি দিম ৷
উষা :- বাৰু পিতা ! তেওঁলোক সদায়
হাৰি থাকে কিয় ? নিজিকে কিয় ?
বাণ :- [হাঁহি] এৰা, ময়ো ভাবো নিজিকে কিয় ?
উষা :- [হাঁহি] পিতা ! তুমি কিন্তু মোৰ কথা কেটা নেপাহৰিবা ৷ আমি এতিয়া যাওঁ দেই ৷ পিতা
! তুমি ইয়াত বহি থাকিবা নেকি ?
বাণ :- অঁ, আই ! মই ইয়াত বহি অলপ জুৰ লওঁ ৷ তহঁত যা ৷
উষা :- সখীহঁত ! বলা, আমি যাওঁ ৷
[সকলো যায়গৈ, বাণে উষাৰ ফালে চাই থাকে ৷]
বাণ :- সিদিনা এই ছোৱালী আছিল, আজি
আহি যৌৱনৰ দুৱাৰদলিত ভৰি দিছে ৷ প্ৰতি অঙ্গৰ পূৰ্ণতা লাহে লাহে ফুটি উঠিছে ৷ লগে
লগে মোৰ এটা চিনলতাও বাঢ়ি আহিছে ৷ উপযুক্ত পাত্ৰ !... ক’তা,
কোনোতো উপযুক্ত পাত্ৰ নাই ৷ মোৰ মনৰ কামনা কোনেও পূৰ্ণ কৰিব পৰা নাই ৷ পৃথিৱীত
তেন্তে সঁচাকৈয়ে উপযুক্ত বীৰৰ অভাৱ হৈছে নেকি ? এই দেৱতা, ইহঁতো কাপুৰুষ ৷ ইমান
বীৰ্য্যহীন শক্তিহীন এই দেৱতাবোৰ ৷ সিহঁতৰ আকৌ গৌৰৱ ! পদে পদে যুগে যুগে দানৱৰ
হাতত লাঞ্ছিত, তথাপি ইমান দম্ভ ৷ দেৱতা ! তথাপি তহঁতৰ অহঙ্কাৰ নগ’ল
৷ সেই স্বৰ্গৰ মণি-মিক্তা-প্ৰৱালেৰে সজোৱা সোণৰ সিংহাসনৰপৰা দানৱৰ পদাঘাতত বাৰে
বাৰে উফৰি পৰিও তহঁতৰ অহঙ্কাৰ ! বাৰু, চাওঁ ৷ তহঁতে মোক নগন্য বুলি দম্ভালি কৰি
হাঁহিছিলি, কিন্তু এইবাৰ মই হাঁহিম ৷ যাওক সেইবোৰ কথা ৷ কিন্তু উষা ! অৱশ্যে তাইক
লৌহিত্যৰ নতুন নগৰতেই অগ্নিগড় মাৰি ৰাখিব লাগিব, নহ’লে
আন উপায় নাই ৷ নগৰ নিৰ্ম্মাণ শেষ হৈছে... তাইৰো যৌৱন... পাত্ৰৰো অভাৱ ৷
[এনেতে মধুমতী সোমাই আহে ]
ৰাণী ! তুমি উপযুক্ত সময়তে আহিছা ৷ মই উষাক সোনকালেই
লৌহিত্যৰ নগৰলৈ পঠাবৰ ইচ্ছা কৰিছোঁ ৷
মধুমতী :- তেন্তে
উষাৰ কাৰণে উপযুক্ত পাত্ৰ আপুনি আৰু বিচাৰি নাপালে নেকি ?
বাণ :- ক’ত
উপযুক্ত পাত্ৰ ? পৃথিৱীত আজিলৈকে মইতো লগ নাপালোঁ ৷ মোৰ ইচ্ছা, উষাক এতিয়া সেই
নগৰতে থোৱা যাওক ৷ উপযুক্ত পাত্ৰৰ বৰ্ত্তমান অভাৱ ৷ [কিছুপৰ মনে মনে থাকি] নহয় ৰাণী, নগৰ যেতিয়া সম্পূৰ্ণ
হ’ল, তেন্তে আৰু পলম কৰাৰ একো
কাৰণ নাই ৷ মই সোনকালেই দ্বিগ্বিজয়ৰ কাৰণে ওলাই যাম ৷ উষাক অতি সোনকালে সেই নগৰলৈ
পঠোৱা যাওক ৷ ৰাণী ! তুমি এই কথা উষাক কৈ সকলো দিহা কৰিবা ৷ দুৱৰী !....
[দুৱৰী আহি সেৱা কৰে]
মন্ত্ৰীক এতিয়াই মন্ত্ৰণা-কক্ষলৈ মাতি আনগৈ ৷
[দুৱৰী যায়গৈ]
ৰাণী ! মই মন্ত্ৰীক গড়ত অগ্নি প্ৰজ্জ্বলিত কৰিবলৈ
আদেশ দিওঁ ৷ তুমি যোৱা ৷
[ৰাণী যায়গৈ ৷ এনেতে প্ৰহৰী আহি প্ৰসেঞ্জিত আৰু দেৱতাসকলৰ আগমন জনায় ৷]
প্ৰহৰী :- সেনাপতি বন্দীসকলৰ সৈতে উপস্থিত ৷
[প্ৰসেঞ্জিতে বন্দী ইন্দ্ৰ, বৰুণ, অগ্নিক লৈ আহি উপস্থিত কৰে ৷ লগত দানৱ
সেনা ৷]
বাণ :- দেৱশ্ৰেষ্ঠ ইন্দ্ৰৰাজ, বৰুণদেৱ, অগ্নিদেৱ !
আপোনাসকলে বুজিছে... আজি কিয় মোৰ আগত আনি আপোনাসকলক উপস্থিত কৰা হৈছে ৷ দানৱক সদায়
দেৱতাই হেয় জ্ঞান কৰি আহিছে ৷ ইন্দ্ৰৰাজ ! আজি মই তাৰেই প্ৰতিশোধ লৈছোঁ ৷ মই
আপোনালোকক সসম্ভ্ৰমে মুক্তি দিছো ৷ কিন্তু আপোনালোকে বশ্যতা স্বীকাৰ কৰক ৷
ইন্দ্ৰ :- অসম্ভৱ ! বশ্যতা স্বীকাৰ নকৰো ৷ কৰিম কিয় ?
তোমাৰ শক্তিত আমাৰ বন্ধন দেখি ? আমি বন্দী হ’ব
পাৰো আমাৰ শক্তিৰ অভাৱত, আমি স্বৰ্গচ্যুত হ’ব পাৰো
আমাৰ দুৰ্ভাগ্যত ; সেইবুলি, বাণ ! তোমাৰ আগত শিৰ দোঁৱাই আমি বশ্যতা স্বীকাৰ কৰি
নাযাওঁ ৷
বাণ :- দেৱৰাজ ! তোমাৰ যিমানেই
বীৰত্ব থাওক, তথাপি তুমি মোৰ বন্দী ৷ সাৱধান !
ইন্দ্ৰ :- বাণ !
সেইবুলি তুমি ভাৱিছানে....
বাণ :- অঁ, ভাবিছোঁ ৷ ভাবিছোঁ , ইন্দ্ৰ আজি মোৰ বন্দী ;
ইন্দ্ৰৰ হাতত বজ্ৰ নাই, ইন্দ্ৰই আৰু অপেস্বৰীবেষ্টিত হৈ অমৰাৱতীৰ সিংহাসনত বহি
সৌৰজগতৰ দেৱতাসমুহৰ ভাগ্য নিৰ্দ্দেশ কৰা নাই ৷ ইন্দ্ৰ আজি দানৱৰ বিক্ৰমৰ আগত লীন
হৈ যোৱা এটা ধূলিকণা ৷ দেৱৰাজ ! আজি মোৰ মনত পৰিছে তাহানিৰ কথা ৷ মনত পৰিছে মোৰ প্ৰপিতামহ
হিৰণ্যকশিপুৰ কথা, আৰু মোৰ পিতা বলিৰাজৰ কথা,... যাক এদিন তোমালোকে স্বৰ্গচ্যূত
কৰি পাতাললৈ নিক্ষেপ কৰিছিলা ৷ আজি তাৰেই প্ৰতিশোধ ৷ ইন্দ্ৰদেৱতা ! আজি তাৰেই
প্ৰতিশোধ ! বুজিব পাৰিছানে দেৱতা ! আজি এই সৌৰজগতত সকলোতকৈ শ্ৰেষ্ঠ দেৱতা নহয়,
দানৱহে ৷
ইন্দ্ৰ
:- ইমান লাঞ্ছনাও সহিব লাগিব নেকি ? কি অপমান ! বসুমতী !
বিদীৰ্ণ হোৱা ৷ তোমাৰ বুকুত সোমাই ঘোৰ লজ্জা নিবাৰণ কৰো ৷ আকাশ ! নামি আহি মোক
নীলিমাৰে আবৃত কৰি দিয়া, মই আৰু মুখ দেখুৱাব নোৱাৰো ! বিদ্যুত ! মোক ভস্ম কৰি
যোৱাহি, মই যে আৰু সহ্য কৰিব নোৱাৰো !
বাণ
:- হা: হা্ হা্
! ইন্দ্ৰদেৱ ! বসুমতী কোন সাহেৰে বিদীৰ্ণ হব ? বিদ্যুত কাৰ ইঙ্গিতত চমকি উঠিব ? আকাশ কাৰ আদেশত নামি আহিব ? আজি বসুমতী স্তব্ধ,
নীৰৱ ; বিদ্যুত আজি ৰশ্মিবিহীন ; আকাশ-পৱন আজি আম্পমান ৷ সকলো বন্দী ৷ ইন্দ্ৰদেৱ !
দানৱৰ বশ্যতা স্বীকাৰ কৰিবই লাগিব ৷
ইন্দ্ৰ
:- বাণ ! ইমান দম্ভ ! ইমান অহঙ্কাৰ ! জানিবা বাণ ! এই
অহঙ্কাৰ তোমাৰ নাথাকে ৷ দেৱতাৰ অভিশাপ ....
বাণ
:- অভিশাপ ?
অভিশাপ নাই ৷ ময়েই জ্বলন্ত মূৰ্ত্তিমন্ত অভিশাপ ৷ কি অভিশাপ দিবা, ইন্দ্ৰ-দেৱতা ?
এতিয়াও তোমাৰ দম্ভ যোৱা নাই, গৰ্ব চূৰ্ণ হোৱা নাই ? [প্ৰসেঞ্জিতক] সেনাপতি প্ৰসেঞ্জিত ! যোৱা, দেৱশ্ৰেষ্ঠ
ইন্দ্ৰক মোৰ বন্দীশালৰ বায়ু সেৱন কৰোৱাগৈ ; সম্যকৰূপে বুজক, অনুভৱ কৰক, সঁচাকৈয়ে
স্বৰ্গচ্যূত ইন্দ্ৰ আজি বাণৰ বন্দী ৷
[বিদ্ৰূপাত্মক
হাঁহি মাৰি]
বজ্ৰপাণি
! বজ্ৰবিহীন বজ্ৰপাণি ! যোৱা, ফুলৰ সুগন্ধৰ পৰিৱৰ্ত্তে পোতাশালৰ দুৰ্গন্ধ সেৱন
কৰাগৈ ৷ উনষাঠি সুস্বাদু ব্যঞ্জনৰ পৰিৱৰ্ত্তে পোতাশালৰ দুৰ্গন্ধময় ব্যঞ্জন ভক্ষণ
কৰাগৈ ৷ কোমল সঙ্গীতৰ পৰিৱৰ্ত্তে বন্দীৰ আৰ্ত্তনাদ শুনাগৈ ৷ কোমল সুখ-শয্যাৰ
পৰিৱৰ্ত্তে এবাৰ ধূলিত বাগৰাগৈ ৷ ইন্দ্ৰদেৱ ! এবাৰ ধূলিত বাগৰাগৈ ৷
[বাণ ওলাই যায় ]
[প্ৰসেঞ্জিতে সকলোকে লৈ যায়গৈ, তাৰ পিছত বাণ ভাবি সোমাই আহে ৷ বেদীত বহি
শঙ্কৰক স্মৰণ কৰে আৰু শঙ্কৰ আহি আবিৰ্ভাৱ হয় ৷ বাণে সেৱা কৰে ৷]
বাণ
:- প্ৰভু !
শতসহস্ৰ সেৱা গ্ৰহন কৰা ৷ অসীম শক্তিধৰ ! অসীম শক্তি দিলা, বিশ্ব বিজয় কৰালা ৷
অপাৰ কৰুণা তোমাৰ প্ৰভু ! তোমাৰ কৃপাত আজি মই অসীম শক্তিশালী, বিশ্ববিজয়ী ; কিন্তু
প্ৰভু ! মনত বৰ দুখ, প্ৰণত আৰু তৃষ্ণা ৷
প্ৰভু ! সঁচা কথা কবলৈ গলে তোমাৰ শক্তিৰ সদ্ব্যৱহাৰ হোৱা নাই ; তোমাৰ সকলো ব্যৰ্থ,
বৰ ব্যৰ্থ, শক্তি ব্যৰ্থ ৷
শঙ্কৰ
:- কি বাণ ? এতিয়াও তোৰ তৃষ্ণা মাৰ নগ’ল
! তইতো ত্ৰিভুৱনৰ সকলো বীৰ্য্যবান বীৰক পদাঘাত কৰি আজি ৰাজচক্ৰৱৰ্ত্তী ৷ দেৱতা
দানৱ মানৱ সকলোৱেই তোৰ বল-বিক্ৰমত স্তম্ভিত ৷ তই ত্ৰিভুৱনৰ মূৰৰ মুকুট ৷ তোৰ কিহৰ
দুখ ?
বাণ
:- নহয়, নহয় প্ৰভু ! মোৰ ৰণ-তৃষ্ণা এতিয়াও পূৰ্ণ নহ’ল
৷ মোৰ প্ৰতিযোদ্ধা নাই ৷ প্ৰভু ! ই মোৰ গৌৰৱৰ কথা হলেও মোৰ শক্তিৰ অসীমতাৰ প্ৰমাণ
নকৰে ৷ তেন্তে প্ৰভু ! মোৰ শক্তিৰ সাৰ্থকতা ক’ত
? মোৰ শৌৰ্য্য-বীৰ্য্য কিহত প্ৰকাশ হ’ল ? দেৱতা
আদি কৰি সকলো কাপুৰুষৰ দৰে পৰাজিত ৷ নহয় প্ৰভু ! মোক উপযুক্ত প্ৰতিযোদ্ধা দিয়া ৷
মই মোৰ গৌটেই শিৱ-শক্তিৰে যুঁজি মোৰ ৰণ-তৃষ্ণা মাৰ নিয়াওঁ ৷
শঙ্কৰ
:- বাণ ! এয়া তোৰ অভিলাষ ? তৃষ্ণাৰ উপশম হোৱা নাই ? বাণ
! তোৰ এই তৃষ্ণা চিৰকাল বাঢ়ি যাব ৷ তাক কোনো বাহ্যিক প্ৰতিৰোধেৰে তই উপশম কৰিব
নোৱাৰ ৷ তই নিজেই এই তৃষ্ণা গুচাব লাগিব ৷ তই সন্তুষ্ট হব লাগিব, তোৰ আত্মশক্তিৰে
৷ বাণ !
বাণ :- নহয় প্ৰভু ! তেনে সন্তোষ মোক নালাগে ৷ মোৰ কিমান
শক্তি তাৰ মোক পৰীক্ষা লাগে ৷ প্ৰভু ! মোক উপযুক্ত প্ৰতিযোদ্ধা দিয়া ৷ ত্ৰিভুৱনত
যদি এনে প্ৰতিযোদ্ধাৰ অভাৱ, তেন্তে তোমাৰ সৰ্ব্বশক্তি দি এজন প্ৰতিযোদ্ধাৰ সৃষ্টি
কৰা ৷ মই এবাৰ প্ৰাণৰ হে্পাহ পলুৱাই যুদ্ধ কৰো ৷
[শঙ্কৰ মনে মনে
থাকি গম্ভীৰ হৈ কয় ৷]
শঙ্কৰ
:- বাণ ! মই
বুজিছোঁ ৷ মই তোক আজি এই বৰ দিলোঁ... তই তোৰ বাঞ্ছিত উপযুক্ত প্ৰতিযোদ্ধা অতি
শীঘ্ৰে পাবি ৷
বাণ
:- [বৰ আনন্দিত হৈ] আজিহে মোৰ মনৰ বাঞ্ছা পূৰ্ণ হৈছে ৷
আজিহে মোৰ শিৱ-সাধনা সফল হৈছে ৷ আজিহে জীৱন ধন্য মানিছোঁ ৷ ইমান তৃষ্ণা বুকত ৰাখি,
ইমান শক্তি বাহুত বান্ধি, কেনেকৈ নিশ্চল হৈ বহি থাকিলোঁহেতেন ! প্ৰভু শঙ্কৰ ! হে
ভকতৰ কল্পতৰু, বীৰৰ শক্তি, মহাদেৱ... নাই মোৰ একো... কিহেৰে সন্তোষ কৰিম প্ৰভু !
জীৱনৰ সকলো তোমাৰ চৰণত অৰ্পন কৰি কেৱল তোমাৰ শক্তিৰে আছো ৷ দিবলৈ আৰু একো নাই ৷
ভকতৰ ভক্তিৰ শত সহস্ৰ পুষ্পাঞ্জলি গ্ৰহণ কৰা ৷ হে বিশ্বপতি, ভীমৰূপ, মহাযোগী...
জীৱনৰ সাধনা আজি পূৰ্ণ কৰিবলৈ মোৰ আগত সৌভাগ্যদেৱতা হৈ থিয় দিছাহি ৷ হে মোৰ
সৌভাগ্য ! হে মোৰ দেৱতা ! হে মোৰ চিৰনমস্য চিৰআৰাধ্য প্ৰভু ! জীৱনৰ সফলতাৰ দিনা আজি ভক্তক এবাৰ চৰণ পদ্মৰেণুৰে
শিৰ ওপচাই দিয়া ৷ জয় শিৱ শম্ভো !
[বাণে ভৰিত দীঘলদি
পৰি সেৱা কৰে ৷]
আঁৰ-কাপোৰ
(সিপিঠিত)
[ইউনিক’ড ৰূপান্তৰ : দিগন্ত শইকীয়া]
No comments:
Post a Comment