নাটক - শোণিত কুঁৱৰী
[জ্যোতিপ্ৰসাদ আগৰৱালা]
পঞ্চম অঙ্ক
দ্বিতীয়
দৰ্শন
[সন্ধ্যা
.... বাণৰ সৈন্যা-শিবিৰ ৷দূৰত হৈন্যবোৰে গীত গাইছে ৷ শিৱৰ আৰতিৰ ধ্বনি কাণত
পৰিছেহি ৷ মাজে মাজে শঙ্খধ্বনি হৈছে ৷ মাজে মাজে এটা দুটা সৈনিক আহি, বাণৰ আগত মূৰ
দোঁৱাই শিৱিৰৰ ফালে বেগ লৈছে ৷ ]
সৈন্যৰ গীত
:-
জয় জয় দানৱ
সেৱিত মহাদেৱ
জয় জয় ত্ৰিশূলধাৰী
জয় শিৱ শঙ্কৰ
জয় জয় বিষধৰ
জয় ভীম বিভোল ভয়হাৰী ৷
বাণ :- সৈন্যৰ
বিজয়-গীতিয়ে মোৰ বীৰত্বৰ কাহিনী ঘোষনা কৰিছে, মন্দিৰৰ শঙ্খ-ঘণ্টাই মোৰেই বিজয়
প্ৰাৰ্থনা কৰিছে, শোণিতৰ আজি ঘৰে ঘৰে যুদ্ধৰ বাতৰিয়ে খলক লগাই ফুৰিছে ৷মোৰো
ৰণ-মতলীয়া প্ৰাণে এবাৰ তাৰ মাজে মাজে আনন্দত উত্ৰাৱল হৈ হাঁহি মাৰিছে ৷শঙ্কৰ ! বহু
যুদ্ধত জয়ী কৰালা, বহু বীৰৰ দৰ্প চূৰ্ণ কৰালা, কিন্তু সমৰ-তৃষ্ণা কিয় নুগুচুৱা
প্ৰভু ? যাধৱৰ সৈতে যুদ্ধ ! সামান্য কথা ৷ মনত সদায় ক্ষোভ ৰৈ গ’ল
৷ উপযুক্ত প্ৰতিযোদ্ধা.... উপযুক্ত প্ৰতিযোদ্ধা ৷ জীৱনত আৰু এই আশা পূৰ্ণ নহ’ল
দেখোন ৷
[এনেতে প্ৰসেঞ্জিত আহি সেৱা জনায় ৷]
প্ৰসেঞ্জিত :-
সেৱা গ্ৰহণ কৰক প্ৰভু ৷
বাণ :-
সেনাপতি প্ৰস্তুতনে ? যাদৱবাহিনী আহি উপস্থিত ৷
প্ৰসেঞ্জিত :- হয়
প্ৰভু, প্ৰস্তুত ৷ আপোনাৰ দাস থাকোতে আপুনি সামান্য যাদৱ-বাহিনীৰ কাৰণে চিন্তিত
নহব প্ৰভু ৷ যাদৱৰ বাতৰি পায়েই মই প্ৰস্তুত হৈ আছোঁ ৷ এতিয়া মাথোন দানৱৰ পতাকা
যদু-বীৰৰ তেজেৰে ৰঞ্জিত কৰি শোণিতৰ আকাশত উৰুৱাবলৈহে অপেক্ষা কৰিছোঁ ৷ প্ৰভু, আদেশ
কৰক ৷
বাণ :-
এৰা, যাদৱৰ লগত আকৌ যুদ্ধ ! মাত্ৰ এখন ধেমালি ৷ বাৰু যি হওক ৷ তুমি যুদ্ধৰ কাৰণে
প্ৰস্তুত হোৱাগৈ ৷ অতি শীঘ্ৰে যাদৱক আক্ৰমণ কৰিবলৈ মোৰ পৰা আদেশ পাবা ৷ যোৱা ৷
প্ৰসেঞ্জিত :- ভাল
৷
[সেৱা কৰি যায়গৈ ৷]
বাণ :-
বহুদিন ধৰি যাদৱে মোক উপেক্ষা কৰি আহিছে ৷ আজি আকৌ নিজেই আহি জোকাই লৈছে ৷
কাপুৰুষহঁত ! লাজ লগা নাই ? শ্ৰীকৃষ্ণ... হা: হা: হা: তাৰ নাতি চোৰ, চোৰক উদ্ধাৰ
কৰিবলৈ আহিছে গভাইত চোৰে ৷ মই এইবাৰ চোৰৰ শাস্তি দিম ৷ এনে কঠোৰ নিদাৰুণ শাস্তি
দিম... নহয় একেবাৰে এই চোৰৰ বংশ সমূলঞ্চে নাইকীয়া কৰিম ৷ শুই আছিলোঁ ৷ সঁচাকৈয়ে
শুই আছিলোঁ ৷ মোৰ তন্দ্ৰা ভাঙি দিলেহি ৷ মই বিচাৰ কৰিছোঁ ৷ চোৰৰ প্ৰাণ-দণ্ড ৷
[শিৱৰ আবিৰ্ভাৱ ]
বাণ :-
জয় শিৱ শম্ভো ৷ [ভৰিত পৰে ] প্ৰভু ! মূৰ্খ কাপুৰুষ শ্ৰীকৃষ্ণই মোৰ পুৰী অৱৰুদ্ধ কৰিছেহি ৷ প্ৰভু ! মই
তাক শাস্তি বিহিবলৈ প্ৰস্তুত হৈছো ৷আদেশ কৰক ৷ কিন্তু প্ৰভু ! কিমান দিন এনে
কাপুৰুষৰ সৈতে যুদ্ধ কৰিব লাগিব ? মোৰ উপযুক্তু প্ৰতিযোদ্ধা ক’ত
? তেন্তে প্ৰভু ! মই আজি পৃথিৱীৰ অদ্বিতীয় বীৰনে ?
শঙ্কৰ :- এৰা,
তয়ে অৱশ্যে অদ্বিতীয় বীৰ ৷ কিন্তু বাণ ! এইবাৰ তোৰ উপযুক্ত প্ৰতিযোদ্ধা উপস্থিত
হৈছেহি, বৰ সাৱধানেৰে যুদ্ধ কৰিবি ৷
বাণ :- [হাঁহি ] অৱশ্যে উপযুক্ত প্ৰতিযোদ্ধায়েই ৷ ভাল,
তেন্তে সেই মহাবীৰৰ কি দুৰ্গতি কৰো ?
শঙ্কৰ :-
হা: হা: হা: ৷ বাৰু বাণ ৷ মই তোৰ সিংহদ্ধাৰৰ তত্ত্বাৱধানত থাকিম ৷ তয়ো যুদ্ধৰ
কাৰণে প্ৰস্তুত হগৈ ৷
বাণ :-
ভাল পিতা ৷
[সেৱা কৰি যায়গৈ ]
শঙ্কৰ :-
ব্যোম্ ব্যোম্ ৷
[কাৰ্ত্তিক আহি সেৱা কৰে ৷]
কাৰ্ত্তিক :- পিতা
কি আজ্ঞা ?
শিৱ :-
নন্দী প্ৰভৃতি প্ৰমথবোৰক লৈ সিংহদুৱাৰত নিযুক্ত থাকিবি ৷
কাৰ্ত্তিক :-
ভাল পিতা ৷
শিৱ :-
আৰু শুন ৷ সাৱধান যাতে এটি মাত্ৰ প্ৰাণীও পুৰীৰ দুৱাৰ পাৰ হব নোৱাৰে ৷ কাকো দুৱাৰ
এৰি নিদিবি ৷ স্বয়ং শ্ৰীকৃষ্ণ আহি অনুৰোধ কৰিলেও নিদিবি ৷
কাৰ্ত্তিক :-
পিতাৰ আদেশ শিৰোধাৰ্য্য ৷ [যায়গৈ ]
শিৱ :- আজি
মই ভক্ত বাণৰ কাৰণে সকলো কৰিবলৈ ওলাইছোঁ ৷ বাণ ! আজি তোৰ ভাগ্যত মোৰো হিংসা হৈছে !
যাৰ নাম মাত্ৰ মোৰ জীৱনৰ সম্বল, যাৰ প্ৰেমৰ এটি মাত্ৰ কণা পাবলৈ মই শ্মশানবাসী...
আজি তই শত্ৰুতাৰ দ্বাৰাই তেওঁৰ অনুগ্ৰহ পাই ধন্য ৷
(সিপিঠিত)
[ইউনিক’ড ৰূপান্তৰ : দিগন্ত শইকীয়া]
No comments:
Post a Comment