নাটক - শোণিত কুঁৱৰী
[জ্যোতিপ্ৰসাদ আগৰৱালা]
তৃতীয় অঙ্ক
সপ্তম দৰ্শন
[উষাৰ নগৰ নগৰ ৷জোনাক নিশা ৷ এটা মুকলি কোঠাত উষাই আকাশৰ ফালে চাই পালঙ্কত
বহি আছিল ৷জোনৰ পোহৰ আহি গোটেই ঠাইডোখৰ পোহৰাই থৈছিল ৷উষাৰ সখীয়েকহঁতে বহি উষাৰ মন
ভাল লগাবলৈ নাম গাই আছিল ৷উষা আনমনেৰে আকাশৰ ফালে উদাস হৈ চাই আছিল ৷চুলিবোৰ
কেঁকোৰা হৈ দুই এডাল উষাৰ গালত পৰি আছিল ৷ ]
সখীবোৰ গায় :-
অ’ সখি আহিব পিয়া
ৰূপহী জোনৰে
কিৰণ জকেমকাই
বিৰিখৰ পাততে আহিব পিয়া
সখীৰে চকুৰে
নিয়ৰ জকেমকাই
লাৱনী গালতে আহিব পিয়া
আমাৰে সখীয়ে
ইনাই বিনাই
বিৰহ-বেদনাতে
মিলন বাসনাতে আহিব পিয়া
[লাহে লাহে চিত্ৰ হাঁহি সোমাই আহে ৷]
চিত্ৰ :- ৰূপহ ! ৰূপহ !
[সকলো ৰয় ৷ উষাই চিত্ৰক দেখি লৰ মাৰি আহি চিত্ৰক সাৱট মাৰি ধৰি চুমা খায় ৷
চিত্ৰয়ো গবা মাৰি ধৰে ৷ ]
উষা :- আহিলা সখী ?
চিত্ৰ :- অ’
আহিলোঁ সখী ৷ পিছে তোমাৰ ভালনে ?
উষা :- মোক আকৌ সুধিছাহে ? মোৰ ভাল
বেয়া দেখোন তোমাৰ হাততেই ৷
[চিত্ৰৰ মুখলৈ চাই থাকে ৷]
চিত্ৰ :- [হাঁহি] নাই, সখী মিছা হল ৷
উশা :- [কিছুপৰ থৰ লাগি
ৰয়] সখী ! [চকু মোহাৰে ]
চিত্ৰ :- ইহ্ , বৰ কান্দি দেখূৱাইছে
! বেজাৰ নো থয় ক’ত ! সজে সজে চকুৰ পৰা হাত
গুচুৱা, তেহে....
উষা :- [চকুৰ পৰা হাত
গুচাই] সঁচা নেকি, সখী আহিছে নেকি ?
চিত্ৰ :- নাইহে , নোৱাৰিলোঁ আৰু
সেইবোৰ এৰি দিয়া ৷
উষা :- [পালেঙত বহি
কাপোৰৰে মুখ ঢাকি কান্দে ৷ তাৰ পাছত চিত্ৰই লুকুৱাই থোৱা ঠাইৰ পৰা অনিৰুদ্ধক লৈ
আহে ৷ সখীবোৰ বৰ ব্যগ্ৰ হৈ অনিৰুদ্ধলৈ চাবলৈ ধৰে ৷]
চিত্ৰ :- উষা....
[উষাই চকুৰ কাপোৰ গুচাই অনিৰুদ্ধক দেখি থৰ লাগি চায়, অনিৰুদ্ধো থৰ লাগে ৷চিত্ৰৰ
ইঙ্গিতত আটাইবোৰ সখী তাৰপৰা গুদি যায়, চিত্ৰও গুচি যায় ৷ উষাই তলমূৰ কৰে ৷অনিৰুদ্ধ
যাওঁ নেযাওঁকৈ উষাৰ ওচৰলৈ যায় ৷উষাই অনিৰুদ্ধৰ ভৰিত পৰি সেৱা কৰে ৷অনিৰুদ্ধই দুই
বাহুত ধৰি তোলে ৷ এনেতে চিত্ৰ, পত্ৰ, আৰু সখিবোৰ সোমাই আহে ৷ চিত্ৰৰ হাতত দুধাৰ
মালা ৷]
চিত্ৰ :- দেখিছা বাৰু ৷
[দুয়ো আঁতৰ হয় ৷]
বাৰু,
এতিয়া এইওৰ কৰি থাকিলে নহয় ৷ এতিয়া তোমালোক দুয়োকে গন্ধৰ্ব্ব প্ৰথামতে তেনেই ওচৰ
চপাই দিওঁ দেই ৷
[উষাৰ হাতত এধাৰ মালা দি ]
হোৱাঁ,
এই ধাৰ লোৱাঁ ৷
[অনিৰুদ্ধৰ হাতত এধাৰ দি ]
হোৱাঁ
এই ধাৰ ৷ উষা, এতিয়া তোমালোকৰ পুৰোহিত ময়েই দেই ৷ বাৰু এতিয়া উষা, তুমি কুমাৰৰ
ডিঙিত মালাধাৰ দি সেৱা কৰা ৷
[উষাই তেনে কৰে ৷]
কুমাৰ
তুমি মালা দিয়া ৷ সখীবোৰে উৰুলি দিয়া ৷
[অনিৰুদ্ধই মালা দিয়ে, সখীবোৰে উৰুলি দিয়ে ৷]
কুমাৰ,
এতিয়া উষাৰ উষাৰ দুগালে দুটি চুমা খোৱা ৷
[অনিৰুদ্ধই নাখাই ৰয়, চিত্ৰই দুনাই কোৱাত অলপ সঙ্চোচকৈ খায় আৰু উষা লাজত
আঁতৰি গৈ পলেঙত কুচিমুচি বহি মুখ ঢাকে ৷]
[চিত্ৰলেখাই হাঁহি চাপৰি মাৰি নাম লগাই দিয়ে, সখীবোৰে নাচি নাচি গায় ৷ পাছত
অনিৰুদ্ধক উষাৰ ওচৰত চিত্ৰই বহুৱাই দিয়েগৈ ৷]
নাম :-
ৰূপহ কোঁৱৰৰ চুমা-পৰশতে
লাজুকী
কুঁৱৰী মৰহি যায় ৷
সোণতে সুৱগা আহি সানি দিলে
গোলাপী
গালতে ৰঙে চৰাই ৷
সপোনৰে সখা আহি দিলে দেখা
দিয়ে
সখী দিয়া হিয়া বিলাই ৷
←আঁৰ
কাপোৰ→
(সিপিঠিত)
[ইউনিক’ড ৰূপান্তৰ : দিগন্ত শইকীয়া]
No comments:
Post a Comment