নাটক - শোণিত কুঁৱৰী
[জ্যোতিপ্ৰসাদ আগৰৱালা]
দ্বিতীয়
অঙ্ক
প্ৰথম
দৰ্শন
[লোহিতৰ পাৰত উষাৰ নগৰ ৷ বেলি মাৰ
যোৱা সময় ৷ দূৰত অগ্নিগড়ৰ অগ্নিশিখা দেখা গৈছে ৷ ব্ৰহ্মপুত্ৰৰ ক্ষীণ শব্দ আহি কাণত
পৰিছে ৷ ওখ অট্টালিকাৰ ওপৰত উষা এটা স্তম্ভত আউজি আছিল ৷ পত্ৰলেখা, চন্দ্ৰলেখা,
মধুলেখা আৰু আন আন সখীসকল নানা ঠাইত বহি কথা-বতৰা পাতি আছিল ৷ উষাই একান্ত মনে
পশ্চিমৰ ফালে চাই গীত গাইছিল ৷]
গীত
গুমৰি উঠিছে হিয়া অভিনৱ তানে ৷
যৌৱনৰ প্ৰথম পুৱাত আজি
ক’ত আছে প্ৰাণৰ আলহী
কোনে
কৈয়ে দিব
কোনে
জানে ৷
[এনেতে চিত্ৰলেখাই
হাতত বীণ এখন লৈ সোমাই আহে ৷]
চিত্ৰ :- ই:, ই: ! যৌৱনৰ আলহী
বিচাৰিছা নেকি হে ? মই জানো, মই জানো ৷
[সখীবোৰে হাঁহে]
নেলাগে,
নেলাগে বাৰু এতিয়া আলহী বিচাৰিব, এই ফালে আহাঁ ৷
উষা :- মোৰ সৌ নৈৰ পাৰলৈ যাবৰ বৰ মন
গৈছে ৷বলা সখী ! তালৈ যাওঁ ৷
চিত্ৰ :- ক’লৈ
? ভাল কৈছা দেওহে ! পিতাৰাই ইয়াত যে তোমাক বন্দী কৰি থৈছে তাক হবলা ভু-কে পোৱা নাই
?
উষা :- কিয়
?
চিত্ৰ :- কিয়, পৰ্ব্বতটো যে থিয় ! তোমাৰ যোগ্য দৰা
নেপাই... মহা দিগ্বিজয় নে দিগগজ্ বীৰ নেপাই !
[সখীবোৰে হাঁহে, উষাই লাজ কৰি ওফোন্দ পাতি আন ফালে যায় ৷]
চিত্ৰ :- ইস্ ইস্ আহাঁ আহাঁ ৷ বাৰু পিছতো লাজসোপা কৰিবা
এথোন ৷
চিত্ৰ :- অ’ চিত্ৰ,
উষাই তোমাক এতিয়া...
উষা :- ইহ্ ইহ্ ... মিছা....
পত্ৰ :- কওঁনে, কওঁ...
উষা :- নাইহে, একো নাই কোৱা ! যোৱা
:-
[এই বুলি যাব খোজে ৷]
পত্ৰ :- নহয় বাৰু, আহাঁ ৷
চিত্ৰ :- মই জানো কিবা লাগিছোঁ ?
আহাঁ আহাঁ ; বীণখন বজাব খুজিছিলা নহয়, আহাঁ ৷
পত্ৰ :- অ’
সেই ফালে হবলা যৌৱনৰ আলহী বিচাৰি যায় ?
[সখীবোৰে হাঁহে ৷]
উষা :- কিহে পেংলাই কৰি থাকা ! ওঁ
বীৰ নহয়....
চিত্ৰ :- বাৰু হৈছে এতিয়া ৷ বাৰু
তুমি বীৰ...
উষা :- যোৱা : !
চিত্ৰ :- নহয় বাৰু ৷ আহাঁ, বজোৱাহি ৷
উষা :- তুমি বজোৱাচোন ৷ পত্ৰই গীত
গাওক, এওঁলোকে নাচক ৷
পত্ৰ :- এৰা, এৰা ৷ মই নাগাওঁ,
এওঁলোকেও নানাচে ; চিত্ৰয়ে গাবও লাগিব, নাচিবও লাগিব ৷ মইনা থাকোতে কাউৰী লৈ....
চিত্ৰ :- বাৰু হৈছে ৷ পিছে মই দেখোন
সদায় নাচিয়েই আছো ৷ ইমান দিন....
উষা :- ৰ’বাহে,
এতিয়া এইদৰে তৰ্ক কৰি থাকোতেই সময় যাব ৷ গোৱাঁ, গোৱাঁ চিত্ৰ ৷
চিত্ৰ :- সঁচাকৈয়ে গাবই লাগিব নেকি ?
সখীবোৰ :- অৱশ্যে, অৱশ্যে ৷
চিত্ৰ :- তেন্তে তাঁৰ বান্ধি লওঁ, ৰ’বা
৷
[আটাইকেউজনীয়ে চিত্ৰক বেঢ়ি বহে, চিত্ৰই তাঁৰ বান্ধিবলৈ লাগে ৷]
উষা :- এতিয়া কাণ মোচৰোতে মোচৰোতে
এযুগ যাব যেনহে পাইছোঁ ৷
চিত্ৰ :- এই হ’ল
ৰবা ; হ’ল আৰু ৷
[তাঁৰ পকায় ৷ তাঁৰ ছিগি যায় ; সকলোৱে হাঁহিবলৈ ধৰে ৷]
চিত্ৰ :- ভাল আপদ !
[আকৌ চেষ্টা কৰে, আকৌ ছিগি যায় ৷]
উষা :- থোৱা, থোৱা, ফালিবা এতিয়া ৷
[হাঁহে]
পত্ৰ :- বোলো এতিয়া বীণখন থোৱা ৷
এনেয়ে গীত গাই নাচা ৷
চিত্ৰ :- অ’
ৰবা : এইবাৰ হব ৷
উষা :- নালাগে, নালাগে উথা ৷
চিত্ৰ :- হব হে ৰবা ৷
উষা :- [চিত্ৰক ধৰি] নালাগে উথা ৷
চিত্ৰ :- তোমাৰপৰা নোৱাৰি দিয়া ৷
[বীণখন আঁতৰাই থৈ]
নাচা
হে পত্ৰ ! নাচা হে, কি চাই আছা ?
পত্ৰ :- ইস্, নাচিব লাগে কোনে, আকৌ
নাচিবলৈ কয় কাক ?
উষা :-
কিহে চিত্ৰ ?
চিত্ৰ :- নচুৱাই নচুৱাই... বাৰু দিয়া ৷
উষা :- গীতো লগতে ?
চিত্ৰ :- উষা বাৰু, কি গাম ?
উষা :- আগতে ইমানবোৰ পৰি আছে ৷ সুৰৰ ৰহণ সানি নি থাকা
৷
[চিত্ৰই নাচে আৰু গায় ৷]
গীত
বোৱাঁ বোৱাঁ দখিণ মলয়া,
তটিনী গোৱাঁ ৷
সমীৰণে আহি পৰাণ জুৰালে আ – হা ৷
কোন নন্দনত পাৰিজাত ফুলে
বিলাই সুৰভি বিয়াকুল কৰে ৷
কোন তটিনী বয়, কুলু কুলু
কুলু
কুলু কুলু কুলু
কুলু কুলু কুলু কই
নিজৰি, নিজৰি, নিজৰি নিজৰি
কোন সুৰে
গান গাই ৷
প্ৰাণ মতলীয়া কৰা আলসুৱা ই
কিনো মায়া,
ই কিনো মায়া ৷
চিত্ৰ :- উস্ ! আৰু
নোৱাৰো, বৰ ভাগৰ লাগেহে ৷
উষা :- সঁচাকৈয়ে চিত্ৰ !
তোমাৰ নাচোন চাই বলিয়া নোহোৱাকৈ থাকিব নোৱাৰি ৷
চিত্ৰ :- বাৰু, বাৰু, প্ৰশংসা কৰিব নেলাগে, যোৱা ৷
উষা :- সঁচাকৈয়ে সঙ্গীত
ইমান সুন্দৰ !
পত্ৰ :- তাতে আকৌ
আচলজনীয়েই গাইছে ৷ নহবনো কিয় ? সোণত সুৱগাৰ দৰে ৷
চিত্ৰ :- এঁ : এঁ:, কব
লাগিছেনে আৰু ! বাৰু প্ৰশংসাখন থোৱা ৷ তোমালোক আটাইকেউজনীকে মই নচুৱাইহে এৰিম ৷
পত্ৰ :- অ’, সৌৱা
আই আহিছে ৷
উষা :- ক’তা ?
পত্ৰ :-
সৌৱা ৷
[আটাইকেজনীয়ে চায় ৷ দেখি,
আহি পাবলৈ বাট চাই থাকে ৷ মধুমতী আহে, আটাইবোৰে সেৱা কৰে ৷]
মধুমতী
:- আই উষা ! ভালে আছনে
?
উষা :- অ’ আই, আছোঁ ৷ তোমালোকে ভালে আছানে ? পিতা ইয়ালৈ নাহে নেকি ? তুমি দেখোন বহুত দিন নহাকৈ আছিলা
?
মধুমতী
:- এৰা আই ৷ মোৰ ভাল লাগিছে ৷ নগৰখন বৰ সুন্দৰ হৈছে আই ৷
উষা :- আই
চিত্ৰ-পত্ৰ ! তহঁত ভালে আছনে ?
চিত্ৰ-পত্ৰহঁত :- হয় আই, আছোঁ
৷
উষা :- [হাঁহি] পিছে আমাৰ
কুঁজী বায়ে সদায় চিঞৰ-বাখৰ কৰি থাকে ৷[কুঁজীক] উ কুন্ধচ
!
[উষাৰ কথা শুনি কুঁজীয়ে তিনি জাপ দি চিঞৰ-বাখৰ কৰি..]
কুঁজী
:- ঔ আই…
উষা :- ধেমালিহে
কুঁজী বাই ! ধেমা…
কুঁজী
:- অঁ’ ধেমালি তো ! হে মই তোৰ জানো সমনীয়া, তাতে মোৰ লগত যে চুপতিখন কৰ ? মোক যে সদায় কুন্ধচ কুন্ধচ
কৰ, মইনো কিহত বেয়া, ৰূপতে বেয়া নে গুণতে
বেয়া নে কিহত বেয়া ? এতিয়াহে বঢ়ী হলো ৷ দাঁত সৰিল, চুলি পকিল, কঁকাল পৰিল; … ডেকেৰী হৈ থকা হ’লে দেখিলিহেঁতেন ! এতিয়াহে দেখিছ মোক এনে হেন ৷ বাটৰ মানুহে ৰ লাগি চাই গৈছিল ৷
[এটাইখনে হাঁহে ৷]
কেইটা ৰজাৰ ল’ৰাই বিয়া কৰিবলৈ
হাবাথুৰি খাই ফুৰিছিল ৷ পিছে মই জানো তেনে কেটালৈ যাওঁ ? এতিয়াহে মোক বোল… যা, যা বুঢ়ী যা ৷
উষা :- ইহ্ কুঁজীবাই ! বেয়া পোৱানো কিয় ? ধেমালি
হে কৰিলোঁ ৷
কুঁজী
:- ধেমালি, যা যা আইহে
! কালিৰ ছোৱালীজনী হৈ তই মোক বেয়া দেখিলি ‘নয়’ ৷ ইমান দিন মাৰ-বাপেৰৰ লগত থাকিলোঁ, কোনেও বেয়া বুলিব নোৱাৰিলে, তোৰ আগত হে হলোঁ বেয়া
!
চিত্ৰ
:- কুঁজী ! তই বাৰু বৰ ৰূপহী দে
৷ মনে মনে থাক ৷
[কুঁজীয়ে চিত্ৰৰ ফালে চকু পোন্দাই চায় ৷]
মধুমতী
:- কুঁজী ! মনে মনে থাক ৷ ধেমালিতে
লাগিব লাগেনে ?
[কুঁজীয়ে মনে মনে বোক্বোকাই থাকে ৷]
চিত্ৰ
:- আই ! তুমি আজিয়েই যাবাগৈ নেকি
?
মধুমতী
:- এৰা আই আজিয়েই যাম ৷
উষা :- নহয়
আই,
আজি নাযাবা ৷ মোৰ বেয়া লাগিব আই ! তুমি ইমান দিনৰ
মূৰত আহিছা ৷
মধুমতী
:- আই ! মই আৰু তহঁতক সদায় ধৰি থাকিমনে
? সখীয়েৰহঁত থাকিব নহয়, কুঁজী থাকিব নহয় ৷
উষা :- [হাঁহি কুঁজীৰ ফালে চাই ] কুঁজী বাইক নেলাগে আমাক ৷
কুঁজী :- [খঙেৰে] নেলাগিবতো কুঁজীক ! কুঁজী
ফেদেলীক নালাগে ৷ চত্ৰলেখীৰ দৰে দীপলীপ কইনা কেখানিনো ক’ত পোৱা ? থ, মোৰ আই হে ! এই কণৰপৰা তুলি-তালি ডাঙৰ কৰিলোঁ, এতিয়া আকৌ তাইকে নলগা হ’ল, নহয় !
[উষাহঁতে হাঁহে ৷ চিত্ৰই চকু টিপিয়াই কুঁজীক জোকায় ৷]
উষা :- বাৰু আই, তুমি মাজে মাজে আহি থাকিব দেই ৷
মধুমতী
:-
বাৰু আহিম আই !
চিত্ৰ:-
বলা সখী, আইক আগবঢ়াই থওঁগৈ ৷
উষা আৰু সখীবোৰ :- ওঁ বলা ৷
[সকলো যায়গৈ ৷]
[কিছুপৰৰ পিছত উষা অকলে কিবা ভাবত বিভোল হৈ আহি
বেদী এখনত বহেহি ৷ এনেতে কেজনীমান সখীয়ে ধূপধূনা দি উষাৰ ওচৰতে ধূপৰ পাত্ৰ থৈ গুচি যায় ৷ উষা বহি বহি ভগৱতীক
ভাবি বিভোল হয় ৷সন্ধিয়া লাগি আন্ধাৰ হয় ৷ সখীহঁতে তেতিয়াও উষাৰ কোঠাত প্ৰদীঞ লগাই
থৈ যোৱা নাছিল ৷ উষা ভক্তিত গদ্গদ্ হৈ কয় ৷]
উষা :- আই ভগৱতী ! হিয়াৰ গুপুত
কামনা-বাসনাবোৰ কাণে কাণে পূৰ্ণ হৈ উথলি পৰিছে ৷ মোৰ শান্ত হিয়া উথলি উঠিছে...
কিহবাৰ আবেগত হিয়া বিয়াকুল হৈছে ৷ মাতৃ ! মোৰ অন্তৰৰ অতৃপ্ত বাসনা তুমি কেতিয়া
পূৰাবা ? মোৰ আকুল হোয়া কেতিয়া জুৰাবা আই !
[মূৰ দোঁৱাই সেৱা কৰে ৷ ভক্তিৰ অশ্ৰু গুগালেদি বৈ আহে ৷ এনেতে আন্ধাৰ
খোটালি পোহৰাই ভগৱতীৰ আবিৰ্ভাৱ হয় ৷ উষাই ভগৱতীৰ চৰণত গবা মাৰি ধৰি মূৰ দোঁৱায় ৷]
ভগৱতী :- উষা ! অচলা ভক্তিত তোৰ তুষ্ট
হলো মই ৷ যৌৱনমুগুধা আই মোৰ, পাবি তোৰ প্ৰাণৰ বাঞ্ছিত স্বামী, মহাবীৰ মহাযোদ্ধা
অনিন্দ্য সুন্দৰ ৷
[ভগৱতী অন্তৰ্দ্ধান হয় ৷ উষাই সেৱা কৰি মূৰ দোঁৱাই থাকে ৷ এনেতে উষাৰ
সখীহঁত সন্ধ্যাদীপ হাতত লৈ সোমায় আহে ৷ ৰঙচুৱা পোহৰ পৰি উষাৰ মুখত এটি অভিনৱ জেউতি
ফুটাই তোলে ৷]
(সিপিঠিত)
[ইউনিক’ড ৰূপান্তৰ : দিগন্ত শইকীয়া]
No comments:
Post a Comment