মোৰ গান হওক বহু আস্থাহীনতাৰ বিপৰীতে এক

মোৰ গান হওক

বহু আস্থাহীনতাৰ বিপৰীতে এক

গভীৰ আস্থাৰ গান



মোৰ গান হওক

কল্পনাবিলাসৰ বিপৰীতে এক এক

সত্য প্ৰসস্তিৰ ধ্যান



মোৰ কলাশৈলীতে মূৰ্ত হওক

এক মধুৰ বৈচিত্ৰ্যৰ মান

এই গানত জাগক

জনৈক সংগ্ৰামী

সৈনিকৰ মহাপ্ৰাণ



মোৰ গান হওক

বহু আস্থাহীনতাৰ বিপৰীতে এক

গভীৰ আস্থাৰ গান



সমসাময়িক সংঘাত

জীৱনৰ জ্যোতি প্ৰপাত

তাৰেই গান হওক ধন্য

হওক সমৱেত কণ্ঠ অগন্য

ধ্বংসমূখী দৃষ্টিভংগী

কিম্বা মনোমালিন্য

সেয়া নহয় মোৰ গানৰ লক্ষ্য

লক্ষ্য শান্তি অনন্য



মোৰ গান হওক

বহু আস্থাহীনতাৰ বিপৰীতে এক

গভীৰ আস্থাৰ গান



মোৰ সুৰবিন্যাসত মূৰ্ত হওক

অতীত বৰ্তমান

চিৰ উজ্জল ভৱিষ্যতেও যেন

তাতেই কৰে নিতে স্নান

মোৰ গান হওক

বহু বাধাৰ প্ৰাচীৰৰ বিপৰীতে

তীব্ৰ গতিৰ গান



মোৰ গান হওক

বহু আস্থাহীনতাৰ বিপৰীতে এক

গভীৰ আস্থাৰ গান II


 

(ভূপেন হাজৰিকাদেৱৰ কণ্ঠেৰে নিগৰিত গীত)

(ইউনিক'দ ৰূপান্তৰণ: পংকজ বৰা)