সেন্দুৰ সেন্দুৰ প্রভাতী সূৰুজ
মোৰ গালে মুখে পৰিছে
পাহৰণিৰ কুঁৱলী ফালি
সোঁৱৰণী যেন আহিছে ।
মনত পৰিছে যেন অন্ত বেলিৰ
বিদায় সনা চাৱনি
লগে লগে যেন দেখিছোঁ পুনৰ
লৱণু কোমল মুখনি ।
মন পথাৰৰ সেউজ সইচত
মলয়াৰ মৃদু নাচোন,
মনত পৰিছে যেন দেকা গাভৰুৰ
চেনেহী সাজোন কাচোন ।
মৰমী গাঁৱৰ সোনালী ৰ’দ
শাওনৰ কজলা মেঘ
ৰিমঝিম বৰষাও পৰিছে মনত
শৰালিৰ নাই লেখ ।
এইয়া মাথো মোৰ গাঁও নহয়,
এইয়া মোৰ মৰমী আই
ঘৰমূখী পখী আহিছোঁ উভতি
পাবলৈ কোলাতে ঠাই ।।
(ইউনিক'ডীয় ৰূপান্তৰ -স্যামন্ত কুমাৰ গোস্বামী)
No comments:
Post a Comment