জয় জয় নৱজাত বাংলা দেশ
জয় জয় মুক্তি বাহিনী
ভাৰতীয় সৈন্যৰ স'তে ৰচিলাঁ
মৈত্ৰীৰ কাহিনী।।
ধৰ্মান্ধতাৰ বিপৰীতে ধৰ্মনিৰপেক্ষতা
বিভেদকামী শক্তিৰ সলনি
গংগা পদ্মাৰে একতা
সামন্ততন্ত্ৰৰ বিপৰীতে
এক নতুন প্ৰজাতন্ত্ৰ
সমৰ তন্ত্ৰৰ সলনি
এক অভিনৱ সমাজতন্ত্ৰ
স্থাপনা কৰি ৰক্তেৰে লিখিলোঁ শ্বেখ মুজিবুৰৰ বাণী
জয় জয় নৱজাত বাংলাদেশ, জয় জয় মুক্তি বাহিনী।
ৰাৱালপিণ্ডিৰ অন্ধকূপত, মুজিবুৰে নকৰিলে সন্ধি।
শেল হানিলেও নুদুয়ে বচন, কি কৰিব কৰি তেওঁক বন্দী ।।
য়াহায়া ভূট্টো শেখ চাহাবৰ হ'ব পাৰে জানো প্ৰতিদ্বন্দ্বী !
সিংহই জানো ভাল পাব পাৰে ধূৰ্ত শিয়ালৰ ফন্দী ।।
জুলফিকৰে আজি মুজিবুৰক, দিব লগা হৈছে মুক্তি।
ৰণ দানৱে জানো বাধা দুব পাৰে বিশ্ব বিবেকৰ যুক্তি।।
নাপাক চয়তানে হালাল কৰা, দহ লাখ নৰ-নাৰীৰ আত্মা।
হ'ল আজি শক্তি, গ্ৰাস কৰিবলৈ জংগীশ্বাহীৰ সত্তা।।
আজি পাখতুন বালুচিয়ে, কিজানি ৰাঙলী কৰে
সিন্ধু নদীৰো পানী।
জয় জয় নৱজাত বাংলাদেশ, জয় জয় মুক্তি বাহিনী।
আমৰ ভাৰত কিছু মাটি নহয়
নহয় মানচিত্ৰ।
শাস্ত্ৰৰ কিছুমান সূত্ৰ।
আমাৰ ভাৰত, এক প্ৰচণ্ড শক্তিৰে
মেলি থোৱা জাগ্ৰত নেত্ৰ।
আৰু লক্ষ্য মাথোঁ ন্যায় মিত্ৰতা
নিবিচাৰে ই পৰৰাষ্ট্ৰ।
বিশাল ভল্গা, গংগা-পদ্মাৰ পাৰ ভাগি একে হ'ল পানী।
জয় জয় নৱজাত বাংলাদেশ, জয় জয় মুক্তি বাহিনী।
ভাৰতীয় সৈন্যৰ স'তে ৰচিলাঁ মৈত্ৰীৰ কাহিনী।।
(ইউনিক'ডীয় ৰূপান্তৰ - উদ্দীপ তালুকদাৰ)
No comments:
Post a Comment