ধাননি পথাৰত লখিমী নামিছে নিয়ৰ টোপাটোপে সৰে

ধাননি পথাৰত

লখিমী নামিছে

নিয়ৰ টোপাটোপে সৰে,   (...২ বাৰ)



শৰতৰ সন্ধিয়া,

পছিমৰ আকাশত

সুৰুযেও ধেমালী কৰে |



ধাননি পথাৰত

লখিমী নামিছে

নিয়ৰ টোপাটোপে সৰে |



পাহুৱাল ডেকাটিৰ

বুকুখন ভৰে

চেনেহীৰ কথা মনত পৰে  (...২ বাৰ)

নিজান জোনাকৰ

শৰত এনিশা,

বৰনৈৰ কাষৰে পজাঁত

যাঁচিলে তাই চেনেহৰে চুমা

সংসাৰ পাতিব গাৱঁত |



ধাননি পথাৰত

লখিমী নামিছে

নিয়ৰ টোপাটোপে সৰে |



এনেতে হঠাতে,

মনবোৰ ভাঙে

জাতিকুল দানৱে

মূৰটো ডাঙে |    (...২ বাৰ)



সমাজে নিদিলেও

চেনেহীৰ পণ,

এৰিব পিতাকৰ ঘৰ |    (...২ বাৰ)



সন্ধ্যা নামিছে,

বন্তি জ্বলিছে

আৰতিৰ সময়ে হ’ল |   (...২ বাৰ)



সমাজৰ নিয়মে

সমাজক ভাঙিছে,

সমাজৰ নিয়মে

সমাজক ভাঙিছে,

চেনেহী নোহোৱা হ’ল ||   (...২ বাৰ)



ধাননি পথাৰত

লখিমী নামিছে

নিয়ৰ টোপাটোপে সৰে |



শৰতৰ সন্ধিয়া,

পছিমৰ আকাশত

সুৰুযেও ধেমালী কৰে |



ধাননি পথাৰত

লখিমী নামিছে

নিয়ৰ টোপাটোপে সৰে ||

*বি:দ্ৰ: এই গীতটোৰ দুটা ৰূপ আছে, সুৰো তেনেকৈ দুটা আছে | মূল আদি ৰূপটো কুৰি শতিকাৰ ৭০ দশকৰ শেষৰ ফালে আৰু ৮০ দশকৰ আৰম্ভনিত আকাশবানী গুৱাহাটী আৰু ডিব্ৰুগড়ৰ পৰা সম্প্ৰচাৰ হৈছিল | পাছত অজ্ঞাত কাৰণ বশত: গীতটোৰ সম্প্ৰচাৰ আজিলৈকে অন্তত: মোৰ কাণত পৰা নাই | সম্ভৱত: হোৱাও নাই | যি কি নহওক মূল আদি ৰূপৰ গীতটো ওপৰত উল্লেখ কৰাটো নহয় | উল্লেখ কৰাটো খুব সম্ভৱ আধুনিক ৰূপ হ’ব যিটো ধ্ৰূপদী ৰূপত গোৱা হৈছে | এই আধুনিক ৰূপৰ গীতটো শুনোৱাৰ বাবে মই শ্ৰীযুত হিমজ্যোতি তালুকদাৰ দেৱক ধন্যবাদ জ্ঞাপন কৰিছোঁ | এই গীতটি শুনাৰ পাছত আৰু কেইবাদিনলৈও পাহৰি যোৱা সুৰৰ আৰু কথাৰ মূল আদি ৰূপটো মোৰ দেউতা আৰু মই চিন্তা-চৰ্চা কৰি, ভাবি গুনি মনত পেলালোঁ | কথাৰ পাৰ্থক্য বেছি নাই কিন্তু সুৰৰ পাৰ্থক্য সম্পূৰ্ণ বেলেগ | কথাৰ ক্ষেত্ৰত তাত গীতটোৰ ওপৰৰ পৰা দ্বিতীয় ফাঁকিটোৰ পাৰ্থক্য মাথোন আছে | হৈছে,

“পাহুৱাল ডেকাটিৰ

বহলকৈ বুকুতে

চেনেহীয়ে ঘুমটি মাৰে,

নিজানকৈ জোনাকৰ

বৰেনৈৰ কাষতে

চেনেহীয়ে চেনেহ যাঁচে |”     

আৰু গীতটো “চেনেহী নোহোৱা হ’ল” ইমানতে সমাপ্ত হৈছে | কথাত ইমানেই পাৰ্থক্য, বাকী পাৰ্থক্য কথাৰ ক্ষেত্ৰত নাই যেন বোধ হয় |

সুৰৰ ক্ষেত্ৰত মূল আদি ৰূপটোৰ সুৰ সম্পূৰ্ণ নিজা আৰু অনন্য | তাত উচ্চৰ পৰা নিম্নলৈ সুৰৰ গতি শুনিলে তবধ মানিবলগীয়া | কোনোৱে এই বিষয়ে যদি আৰু মূল্যৱান সংযোজন কৰিব পাৰে সি হ’ব আদৰণীয় |

*মূল কথা: মিত্ৰদেৱ মহন্ত (?)
(ইউনিক'ডীয় ৰূপান্তৰ  → প্ৰাঞ্জল বড়া)