আজিৰ কবিতা তাই

আজিৰ কবিতা তাই

খোজ কঢ়া ছন্দেৰে যায় দিঠকলে’,

          আহিলে ওলাই

          খোজে খোজে নৱ লয়লাস

                   অভিনৱ ছন্দবিকাশ ৷

কল্পনাৰ ফুলনিত

সোণালী সপোন দেখি

অত দিন শুই থাকি

যন্ত্ৰৰ গুম্‌গুমনিত সাৰ পায় ৷

দেখে...

আকাশেদি উৰি যায়

যন্ত্ৰবিমান ;

শুনে....

বাজে খৰ্‌খৰণিৰে ৰেডিঅ’ৰ গান ৷

খুলি থৈ সোণখাৰু

কঙ্কণ......

গাৰ পৰা মচি থৈ

কুঙ্কুম – চন্দন ;

ৰেলৱে – ট্ৰেইনৰ

তৃতীয় শ্ৰেণীত উঠি

বনুৱাৰ – হজুৱাৰ গাঁৱলৈ যায়,

শাক – ভাত খায় ৷

ম’তা সাজ পিন্ধি তাই

ফুকাৰিছে.....

বিপ্লৱী বিকুল ৷

কম্পমান সাগৰৰ ইকুল – সিকুল ৷

ধূলিলৈ নামি যায় ....

মাইনত নামি চাই

কাৰখানা ফেক্টৰীত ভূমুকিয়াই ;

সুন্দৰৰ ৰাজ্য দেখি থানবান

আজি কবিতাৰ অভিমান ৷

কপালৰ গাঁথি থোপাকৈ

চকুত জ্বলাই তোলে এক নৱজ্যোতি

নতুন দিনৰ তাই নতুন পোছাক পিন্ধি

                   আজি ৰূপৱতী ৷

বাল্মীকিৰ দিনৰে তাই

          চিৰনবীনা

          চিৰযৌৱনা

          যুগাগ্ৰদূতী ৷৷

[জ্যোতিপ্ৰসাদ আগৰৱালাদেৱে ৰচা কবিতা]

[ইউনিক’ড ৰূপান্তৰ:  দিগন্ত শইকীয়া]