মৌমাখিয়ে মৌ বিচাৰে
ফুলৰ চুপহিৰ
মই বিচাৰোঁ অমিয়া মৌ
বিশ্বৰূপহীৰ ৷
মই খন্তেক জ্বলা অনুপখিলা
দুদিনলৈ আহিলোঁ মই
পাতিলোঁ মই মেলা,
ৰূপৰ ৰসৰ গন্ধ গানৰ
খন্তেকীয়া খেলা
ধূলি ধেমালিৰ বেলা ৷
মোৰ পখিলা পাখিত
সৰু সৰু, জোন বেলি তৰা
পৃথিৱী পোহৰ কৰা
ফুৰ্ ফুৰ্ কৈ উৰি উৰি.... ঘূৰি ঘূৰি ঘূৰি,
মৌ বিচাৰো অনন্ত পাহিৰ
তোৰ পাৰ নোপোৱা হাঁহিৰ ৷
চকুপানী টুকি টুকি
তোৰ ফুলনিত মাৰোঁ উকি
বিননি মোৰ বিনাই বিনাই
চিৰ বিৰহীৰ
মই বিচাৰোঁ অমিয়া মৌ
বিশ্ব-ৰূপহীৰ ৷৷
(জ্যোতিপ্ৰসাদ আগৰৱালাদেৱে ৰচা গীত; তামোলবাৰী,
০১/১০/১৯৪৮)
(ইউনিক’ড ৰূপান্তৰ:
দিগন্ত শইকীয়া)
No comments:
Post a Comment