পৰ্বততে ফুলিলে ৰঙানোকৈ (নাটক : শোণিত কুঁৱৰী)

পৰ্বততে ফুলিলে ৰঙানোকৈ ফুলে কলি

          ৰেণুৰে বোলালি তই কুমলীয়া হাত ৷

অ’ ভৈয়ামৰ সোণামুৱা কিনো কৰ গুণি গাথি

          লেখি লেখি সেউজীয়া পাত ৷         

                   বনে মইনা সেউজীয়া,

                   গছে মইনা সেউজীয়া,

                   পাতে মইনা সেউজীয়া পাত,

মইনা চৰাইটিয়ে গছৰ ডালে পাতে পৰি

                   মাতিছে মিঠা মিঠা মাত ৷

আমনে জিমনেকৈ

          থাকনো তই কিয় ঐ

                   গালতেনো দিয় কিয় হাত ?

                   হাঁহ অ’ মোৰ মইনা

                             হাঁহ অ’ হাঁহ ৷

ভালেনো পাওঁ চাবলৈ,

                   ৰঙা ওঁঠৰ হাঁহিৰ সতে

                   জিকিমিকি দুয়ো পাৰি দাঁত ৷৷

(জ্যোতিপ্ৰসাদ আগৰৱালাদেৱে ৰচা গীত)

(ইউনিক’ড ৰূপান্তৰ:  দিগন্ত শইকীয়া)