অনুসন্ধান আকাংক্ষাত

Sunday, July 29, 2012

মোৰ সোণৰ গাঁও



মোৰ সোণৰ গাঁও

          তোৰ ধাননি

          তোৰ বননি

                   বৰ ভাল পাওঁ

                   মোৰে সোণৰ গাঁও ৷



আকাশ জুৰি সোণৰ তৰা

মাটিও সোণতো চৰা

    বুকু মৰমৰে ভৰা

          তোৰ সোণ হালধীয়া

               ফুলা সৰিয়হডৰা

                   বৰ ভাল পাওঁ

                        মোৰ সোণৰ গাঁও ৷



কত যে সোৱাদ ফল

আম লেটেকু পনিয়ল

          চেনিচম্পা কল

তোৰ জুৰিটিৰ ফটিকধুনীয়া জল ৷

                   বৰ ভাল পাওঁ

                   মোৰ সোণৰ গাঁও ৷



তোৰ বন ফুলনিত বনৰীয়া ফুল

          তাত বনজোনাকী উৰে

জিলিক জ্বলাক বনজোনাকী ঘুৰে

          এন্ধাৰ বাটত, পোহৰ বিলাই

                   গাঁও লখিমী ফুৰে ৷



তোৰ ফুলনিৰ বন চিকুনাই থৱ

          বকুল বন্দুলী শেৱালি নেৱালি

                   খৰিকাজাঁই গুটিমালী

                             তগৰ কেতেকী

                                       চেনিচম্পা

                             গোন্ধবিৰিঙা ৰোৱ ৷



নিতৌ পুৱা বেলিটো চাই

          মন চিকুণাই লৱ

অৰুণ ৰঙা ফোঁটটো পিন্ধি

          ন গাভৰু হৱ ৷



তোৰ নামঘৰৰ

     ভোৰতালৰ

          ৰজন জনিত

               সোণপুৱতিৰ

                   সোণৰ দিনৰ

                        সোণবাতিৰ গাঁও

তোৰ বননিৰ... সোণ পথাৰৰ

          সোণ বাটেৰে

ন পৃথিৱীৰ ন গাঁৱলৈ

          আগবাঢ়ি যাওঁ

                   মোৰে সোণৰ গাঁও

                   বৰ ভাল পাওঁ ৷৷


 
(জ্যোতিপ্ৰসাদ আগৰৱালাদেৱে ৰচা গীত; অষ্টমী পূজা, ১০/১০/১৯৪৮)
(ইউনিকড ৰূপান্তৰ:  দিগন্ত শইকীয়া)

No comments: