অনুসন্ধান আকাংক্ষাত

Friday, July 6, 2012

ৰূপৰে পানীতে সোণৰে পানচৈ


ৰূপৰে পানীতে সোণৰে পানচৈ

                   মেলি দে ঐ

                   মেলি দে, মেলি দে, মেলি দে ঐ ৷


পখিলা পাখিৰে পালে উৰুৱাই

                   ফুলৰে পাতৰে হৈ

সৌ নীল আকাশৰ কোন সীমনাত

                   বাজে অসীমৰে বাঁহী

তাত নিদ্ৰাৰ আন্ধাৰ ভেদি

                   জাগে অৰুণৰে হাঁহি

তালৈ, তালৈ

মেলি দে, মেলি দে, মেলি দে ঐ ৷


জীৱন পাৰৰ সেউজী পথাৰ

মৰণক আকুল ফেনে-ফোটোকাৰে

                   পাছতে এৰি থৈ

বিৰহৰে বেজাৰতে আনন্দ জিলিকে

                   মিলনতে বিৰহ লিখা

জীৱন মৰণ জিনি জিলিকে

                   প্ৰণয়ৰে ধ্ৰুৱতৰা

                   উজলি উজলি মাতিছে ঐ

                   পোহৰলৈ, পোহৰলৈ,

                   জ্যোতিৰ দেশলৈ ৷৷


(জ্যোতিপ্ৰসাদ আগৰৱালাদেৱে ৰচা গীত)
(ইউনিকড ৰূপান্তৰ:  দিগন্ত শইকীয়া)

No comments: