অনুসন্ধান আকাংক্ষাত

Saturday, June 30, 2012

দেহি ঐ ! দূৰৈৰে গাঁৱেখনি


দেহি ঐ ! দূৰৈৰে গাঁৱেখনি

            ধনে-ধানে পূৰে

                        নিমাত মৰিশালি হলে,

                                    আৱৰী মানে পাই

                                                ধনে-সোণে চুহি

                                                            পুৰি ছায়ে কৰি গল ৷


দেহি ঐ ! তাতে কোন গাভৰুৱে

            ৰূপৰ ফুল পিন্ধিছিল

                        কপৌফুল পিন্ধিছিল কোনে ?

                                    কোন ডেকাদেৱে

                                                হাঁহি কাষ চাপিছিল...

                                                            ওপৰে তিৰেবিৰায় জোনে ৷


দেহি ঐ ! তাতে কৰে সখিয়তী

            পৰি ডালে-পাতে

                        মাতিছিল সখী ঐ বুলি,

                                    তাতে কোন ৰূপহীয়ে

                                                নৈৰে ঘাটতে

                                                            বহি মেলাইছিলে চুলি ?


দেহি ঐ ! দূৰৈৰ গাঁৱেখনি

            আছিল জকেমকি

                        চিন-চাব এটিকে নাই,

                                    হলে গহীন হাবি

                                                বাঘে-ঘোঙে ভৰি

                                                            হিয়া ছাঁতে কৰি যায় ৷৷



(জ্যোতিপ্ৰসাদ আগৰৱালাদেৱে ৰচা গীত)
(ইউনিকড ৰূপান্তৰ:  দিগন্ত শইকীয়া)

No comments: