সোনৰ কাঠিৰ পৰশ পোৱা

সোনৰ কাঠিৰ পৰশ পোৱা

আলফুলীয়া হাতেৰে

কোনেনো ধূলিক সাবটি লয় ?

একেটি ঘৰৰ দুটি মানুহ

দুটি জীৱনৰ কথা শুনা ৷

এজুপি লতাৰ দুটি কলি

এটি যে নিয়ৰত থাকে উমলি

আনটিয়ে নিয়ৰৰ টোপাল নাপাই

মাথোঁ খায় হাবাথুৰি ৷

এটি জীৱনত নিতৌ হৰষ

কোনোবাই সানি দিয়ে সোণৰ পৰশ

আনটিৰ জীৱনৰ আজিৰ সমল

মাথোঁ দুখৰে দিন গণা ৷

এটি জীৱনৰ চকৰি ঘূৰে

(তাত) চিক্ মিক্ জেউতিৰ ৰহণ চৰে

আনটিৰ আশা ধুলিত বাগৰে

নাই তাত পোহৰৰ এটিও কণা ৷৷

এটিয়ে সৰগক হাততে পায়

সৰগৰ সোৱাদে নিতে আমুৱায়

আনি দিব ওভোতাই কোনে বা আজি

আনটিৰ জীৱনে হেৰুৱা হাঁহি

সুন্দৰ সৰগৰ মধুকণা ৷

(কথাছবি: ধুমুহা, ১৯৫৭ চন)

(ভূপেন হাজৰিকাদেৱৰ গীত)

(ইউনিক'ডীয় ৰূপান্তৰ - দিগন্ত শইকীয়া)