অতিকৈ চেনেহৰ বহলকৈ পৃথিৱী

অতিকৈ চেনেহৰ বহলকৈ পৃথিৱী

তাতোকৈ চেনেহৰ ভাই,

আনন্দৰ সীমা নাই ৷

          ৰছ দলৰ কি ক্ষিপ্রতা চাব,

          সমাজৰে পথাৰতে

          কিনো ধোপ খেলিলাঁ

          পাৱতে জেন এঠা সনা আছে

          সেই এঠাৰে তোমাৰ আমাৰ

          দুখন বুকু এখন হ’ল

          ৰঙতে চোন বলিয়া হৈ নাচে !

এনেনো ভাল লাগে বান্ধৈ

এনেনো ভাল লাগে

ভল্গানদী কিনো চাবা

যেন আমাৰ লুইতহে ৷

          এনেনো ভাল লাগে-

          ডন্ নৈখন কিনো চাবা

          যেন জীয়া ভৰলীহে ৷

েনেনো ভাল লাগে

বোখাৰালৈ কিনো চাবা

যেন আমাৰ কাশ্মীৰহে ৷

          এনেনো ভাল লাগে

          মস্কোলৈ কিনো চাবা

          শান্তি বিৰাজ কৰিছে ৷

এনেনো ভাল লাগে

বিজ্ঞানলৈ কিনো চাবা

মানৱ কল্যান সাধিছে ৷

          এনেনো ভাল লাগে

          ৰাজনীতিলৈ কিনো চাবা

          পঞ্চশীল মানিছে ৷

এনেনো ভাল লাগে

দূৰণিৰে বুকুৰ বান্ধৈক

অসমে আদৰিছে ৷

          এনেনো ভাল লাগে বান্ধৈ

          এনেনো ভাল লাগে ....... ৷

(গুৱাহাটী: ১৬/১১/১৯৬৫ ; গুৱাহাটী নেহেৰু ষ্টেডিয়ামত ৰাছিয়াৰ ফুটবল খেলুৱৈ দল এটাই খেলাৰ সময়ত ভূপেন হাজৰিকাদেৱে ৰচনা কৰা ৷)

ইউনিক'ডীয় ৰূপান্তৰ :  দিগন্ত শইকীয়া