উৰ্ উৰ্ শান্তিৰ
পখীটি
উৰ্ উৰ্ শান্তিৰ
পখীটি |
এই আকাশ , এই ভূমি
নকৰিবি মৰুভূমি
বিষৰ ধোঁৱাৰে
এন্ধাৰ ৷
এই মানুহ, এই প্রদেশ
এই মানুহ, এই স্বদেশ
শোষণমুক্ত কৰ্
এইবাৰ ৷
ৰংমন ৰঙিলী শুন্
তহঁতৰ বহুতো গুণ
মুঠিত বহু
অধিকাৰ ৷
নগৰক নকৰিবি
কাৰাগাৰ
গাঁও যেন নহয়
ছাৰখাৰ
খোলা ৰাখ্ আশাৰ
দুৱাৰ ৷
আবাল-বৃদ্ধ-অবলা
নাৰী
সিহঁতক দে আশাৰ
তৰী
পায় যেন সিহঁতে
পাৰ ৷
জীৱন নৈৰ পাৰে
পাৰে
গঢ় মথাউৰি
দুৰ্নিবাৰ ৷
শেষ কৰ্ মৃত্যু-আশঙ্কা
জীৱনলৈ আন
অনুকম্পা
বজা শান্তি
জয়ডঙ্কা
ভাঙি দে ক্রোধৰ
কাৰাগাৰ ৷
(কলকাতা: ১ মাৰ্চ, ১৯৯৪)
(ইউনিক'ডীয় ৰূপান্তৰ - দিগন্ত শইকীয়া)
No comments:
Post a Comment